No.4096/2020-2021

Kolasib 14th August, 2020 : Vawiin khan DC Conference Hall, Kolasibah Dr H Lalthlangliana, Chairman District Level Monitoring Committee/ District Bawrhsap hovin District Level Monitoring Committee for Central Sector Scheme ten ( CSS) thutkhawmna an nei a, Kolasib district chhung ah Farmers Producer Organisation kaltlangin Aieng leh Dragonfruit a hmalakna neih nise tih an rel.

Dr H Lalthlangliana chuan, sawrkar laipui ruahmanna a Kolasib district a Farmers Producer Organisation din tur a hmalakna a awm tur chu phurawm a tih thu leh thawhhona tha nen chuan loneitute tan hlawhtlinna a awm ngei a beisei thu a sawi a. Hlawhtling tak a kalpui a nih chuan thlai thlan chhuah bik hmang a Kolasib district tan a hming chher theihna hmanraw tangkai tak a nih tur thu a sawi bawk a ni.

Kolasib District-a kuthnathawktu intelkhawm Farmers Producer Organisation (FPO) din dan tur te leh hlawk zawk leh mumal zawka an kal theihnana hmalakna tur sawiho a ni a. He scheme hi 2020-2024 chhung kalpui tur a ni a, ram pumah FPO 10000 din tum a ni. FPO pakhat tan hian kum 3 chhungin Rs 18 lakhs ruahman niin FPO tinah hian members 100 tal an awm a ngai thung a ni. Kolasib District-ah chuan Dragonfruit leh Aieng ching turin hmalak nise tih a ni. He Scheme hnuaia FPO din tharte tan hian Companies Act emaw Co-operative Societies Act hnuaiah in register tur a ni ang a, he mi hnu hian Credit Guarantee Facility 85% thleng an hmu thei ang a, Bank kaltlangin Loan a pung hniam zawkin hmuh theih a nih dawn thu meeting-ah hian tarlan a ni. Hei bak ah hian Sawrkar atangin Equity grant Farmers tinah Matching grant Rs 2000/- theuh, a belhkhawma Rs 15.00 lakh pel lo FPO tin tan hmuh theih a ni bawk ang.

Meeting-ah hian Pu J.D Traite, Member Secretary, District Level Monitoring Committee/District Development Manager (DDM) NABARD chuan Farmers Producer Organisation (FPO) Central Sector Scheme (CSS) chungchang sawizauna leh sawifiahna hun a hmang bawk a ni.

Kolasib district DAO, DVO, DFDO, DHO aiawh bakah, Senior Scientist & Head KVK, Kolasib District, ATMA leh Kolasib Turmeric Grower Group aiawh te an tel a ni.