No.1184/2020-2020

Vawiin chawhnu khan DC Conference Hall, Kolasib ah Covid-19 avanga Inkharkhip chhawnglina kalpui dan tur relin District Level Task Force on Covid-19 chu an chairman Dr H. Lalthlangliana, Deputy Commissioner hovin an thukhawm.

Dr H. Lalthlangliana chuan he hunah hian inkharkhip kalpuina hmasa a Sawrkar leh khawtlang tlawmngai pawl hrang hrangte thawhhonaah lawmthu a sawi a, Chennai leh Puducherry-a Mizoram mi leh sa tangkhang Bairabi Rail station a lo haw te dawnsawn kawnga mawhphurna hrang hrang neituten tha taka an mawhphurhnate an hlen danah lawmthu a sawi bawk a ni.

Mizoram mi leh sa, ramdang a tangkhang lo haw tur hnaivai, West Bengal leh Kerala atanga an awm thu ngaihthlak a ni a, Vairengte kaltlanga lo haw turte ei leh in inpek dan tur leh pekna hmun tur rel a ni bawk. Home quarantine chu loh theihloh a nih loh chuan kalpui tum a nih loh thu te, Polytechnic, Thingdawl, Jordan home, Sethawn leh a tul a nih chuan JNV, Thingdawl te pawh chei that a, Quarantine facility atan hman a nih tur thu sawi lan a ni. Quarantine facility enkawlna kawngah pawn lam atanga tlawhtu awm tam lo tur a inkaihhruaina kalpui a tul thu tarlan a ni a, Quarantine facility a awmte mamawh chu District a thuneitu ten a tul ang ang an ngaihtuah tur thu ngaihthlak a ni.

Bungraw phur motor, ramri kan a tlan thin khalhtute, a hrang deuh a an riahna tur hmun, anmahni awmna khua theuhah te ruahman a tul thu sawi a ni a, dawr bungraw sem lirtheite chu an bungrua hlanthlakna hun siam mai nise tih rel a ni a, enchhin nan karkhat chhung chu motor neituten VLTF te hriattirin, zing leh zan dar 6 leh dar 10 inkarah kalpui thin nise tih rel a ni bawk. Online courier, bungrua chah thlen sem thintute chungchang ngaihtuah a ni a, a semtu turte chuan DC Office-ah inhriattir a, ID felfai tak nen bungrua sem thin nise tih a ni.

Motor intlanchhawk chungchangte, zan chhuah khap kalpui dan turte, puipunna a inkaihhruaina kalpui dan turte sawiho niin DLTF a senso tawh zat te ngaihthlak a ni bawk.