4059/2022-2023  

Kolasib dated 31st March 2023: Vawiin chawhnu khan Chief Medical Officer pisaah Kolasib District Maternal & Child Death Review Meeting neih niin April, 2022 leh March 2023 inkar a nau piang thla 6 hnuai lam thi leh nu nau chunga boral awm dan dinhmun thlirletna hun an hmang a. Dr. Lalawmpuia Chhangte, CMO, Kolasibin hun kaihruaiin Dr. RK Lalthlamuana, SMO chuan thutkhawm koh a nih nachhan sawi zauna a hmang a. District Medical Superintendent, District Information & Public Relations officer, District Mission Coordinator, Women & Child Development, District Hospital-a Doctor-te, Nursing Superintendent, Kawnpui leh Vairengte Medical Officer leh khaw hrang hrang atangin hemi kaihhnawih a harsatna tawk chhungkaw aiawhte an tel bawk a ni.

Dr. Lalawmpuia Chhangte, CMO chuan mihring hriselna enkawl kawngah sawt zawk leh awmze nei zawk a District Hospital leh hriselna enkawlna hmun hrang hrangten hmasawnna an neih theih nan hun kal tawh a hnathawh dan thlirlet a pawimawh thu a sawi a. Kum 2022-23 chhung a Kolasib district-a nau piang boral leh nu nau chunga thihna awmte thlen chhan thlirletna chuan hriselna enkawl kawnga mawhphurtute tan insiamthat ngaihna lai hmuh fuhna hun tha a siam phah ngei a beisei thu a sawi. Chief Medical Officer chuan mihring theihna leh thiamna ina a daih loh chang a damna beisei a Damdawi in pantute tihhlawhchham chang a thlen hian dam lo chhungte hnen ah chiang takin dam lo natna te, enkawlna kalpui dan te leh theihtawp chhuah a enkawlna kalpui a nih dan hriattir thin a pawimawh thu a sawi bawk a ni.

Thutkhawmnaah hian April 2022 leh March 2023 inkar hian Kolasib district chhunga nau piang 1096 zingah boral 22 an awm thu tarlan a ni a, hei hi nau piang 1,000 zel a 20.5 anga chhut a ni. Nau piang thi atanga za zel a 50 chu District Hospital-a boral an ni a, za zela 72.7 chu thla 1 hnuai lam an nih thu tarlan a ni bawk. Nau piang leh nu naupai te hrisel tur chuan Health Department piah lam ah hriselna kaihhnawh a sawrkar office hrang hrang leh khawtlang an pawimawh thu sawi niin eitur hrisel ngaih pawimawh te, damdawi tha leh tui thianghlim te, faina leh thianghlimna ngaih pawimawh leh zirna in kalpui dan thlengin nghawng thui tak a neih thu sawi a ni a, Outpatient Department (OPD) ngaih hlut zual a pawimawh thu sawi a ni bawk. Vawiin thutkhawmnaah hian nau piang boral bak ah nu nau chunga boral 2 awmte enkawlna pek an nih dan te thlirletna hun neih a ni.