4060/2022-2023  

Champhai, the 31st March, 2023: Mizoram Badminton Association (MBA) leh Champhai District Badminton Association (CDBA) tangkawp buatsaih Mizoram Badminton Association (MBA) Finals, 2023, March ni 28 atanga ni 31, 2023 chhunga khelh chu vawiin khan zawhfel a ni. MBA Finals 2023 kharna hun vawiin chawhnu a neih hi Health & Family Welfare Board Vice Chairman Dr. ZR Thiamsanga, Champhai North bialtu MLA chuan khuallian niin a hmanpui a, District Bawrhsap Pu James Lalrinchhana chuan he hun hi a telpui bawk.

Khuallian Dr. ZR Thiamsanga chuan badminton chu Mizote khelh chi tak leh khawvel huap infiamnaa kan lan theihna turte zinga sports discipline pawimawh tak a nih thu sawiin, badminton-a khawvel awptute hi kan pian ang pian nei, kan hmel ang pu khawchhak lam mite deuh vek an ni a, insumtheihna, tumruhna, beidawn duh lohna leh huaisenna kan neih hmasak phawt chuan khawvel huapa kan lan theih lohna tur a awm lo a ni, a ti a. Tuna thalai rual kum lama la naupang tak tak leh badminton khawvela palian ni tan mekte chuan badminton hmangin Mizoram hming an tih that zual theih thu a sawi a; badminton inelna huangah India ram mai nilo khawvel huap thlengin kan theihna tak tak kan pholang thei a ni, a ti bawk.

Health & Family Welfare Board Vice Chairman chuan tunhnaia badminton intihsiakna national level-a Mizote hlawhtlinna chan hrang hrangte leh India ram aiawh tura thlan an awmte chu ropui a tih thu leh State tana mi chhuanawm tak an nih thu a sawi a. Tunhnaia badminton inelnaa hlawhtlinna chang a tarlan zingah hian India ram puma kum 40 chunglam badminton inelnaa Champion leh World Championship South Korea-a khelh tura India aiawha tel tur Lalmuanawma te, 45th Indian Masters National Badminton Championship Goa State-a khelh zawh taka kum 70 chunglama Champion F.Zokima te, All National Ranking Championship Under 17 a Champion Lalthazuala te, All India Sub-Junior Championship Under 15 Doubles Finalist Malsawmhlua bakah tunhnaia national level-a silver medal dawngtu Lalthanzuala, Zokhumi leh K.Lalramzauva te an tel a ni.

Champhai North bialtu MLA Dr. ZR Thiamsanga chuan Champhaiin badminton-ah hma a sawn nasat thu sawiin, Champhai District-a b badminton chawisan kawnga Champhai District Badminton Association (CDBA) leh mi thahnem ngai tak takte inpekna leh hmalaknate fakawm a tih thu sawi a. Nikuma National Sub-Junior Championsship-a Mizoram aiawha feh chhuak Zoramthari leh Mesak Lalrawngbawla te chhuanawm a tih thu a sawi bawk a. Ruihhlo leh nun kawng hrisel lo laka him tlan nan infiamna chawisana uar deuh deuh a pawimawh thu pawh sawiin, Champhai Town Hall chung khuh siam tha turin Special Assistance to State for Capital Investment (SASCI) kaltlanga hmalak mek a nih thu a sawi bawk.

MBA Finals 2023 kharna hun hi Pu H.Rothangliana, Sr. Vice President, Champhai District Badminton Association (CDBA) chuan a kaihruai a. Pu Paul Zakhuma, Gen. Secretary, CDBA in report a pe a. Pu Lalchhuansanga Sailo, Fin. Secretary, CDBA in lawmthu sawiin hun hman a khar a ni.

MBA Finals 2023 hi Mizoram Badminton Association (MBA) hnuaia calendar year 2022-2023 tournament hnuhnung ber niin season khat chhunga senior category 5; Men’s Singles, Men’s Doubles, Women’s Singles, Women’s Doubles leh Mixed Doubles huang chhunga a thiam zual Top 8 chinte chauhin an khelh theih tournament leh ranking point sanna ber a ni. Tun tum hi hetiang tournament buatsaih tum hnihna a ni a, MBA Finals 2023 ah hian mipa 18 leh hmeichhia 12, an vaiin player 30 te an tel a. he MBA Finals hi an khel a. Result kimchang chu hetiang hi a ni:

1) Men's Singles Final:
Saitluangpuia Sailo, Bawngkawn Badminton Club chuan Joseph VL.Ringngheta, Ralte Villa Badminton Club chu 21-9, 22-20 in a hneh.

2) Women's Singles Final:
Abigail Lalthazuali, Saron Badminton Club chuan Lalrempuii, Ralte Villa Badminton Club chu 21-13, 17-21, 21-11 in a hneh.

3) Men's Doubles Final:
Lalrinawma leh Laldintluanga Tlau, Bawngkawn Badminton Club-te tangkawp chuan C.Lalramzauva leh Joseph VL Ringngheta, Ralte Villa Badminton Club-te tangkawp chu 17-21, 21-16, 22-20 in an hneh.

4) Women's Doubles Final:
Lalrinhlui leh Zothansangi, Ralte Villa Badminton Club-te tangkawp chuan Laldingpuii, Mission Veng Badminton Club leh Lalrempuii, Ralte Villa Badminton Club-te tangkawp chu 8-21, 21-17, 21-12 in an hneh.

4) Mixed Doubles Final:
Laldintluanga Tlau, Bawngkawn Badminton Club leh Zorinkimi, Chaltlang Badminton Club-te tangkawp chuan Joseph M.Lalrinawma leh Lalrinhlui, Ralte Villa Badminton Club-te tangkawp chu 21-13, 21-18 in an hneh.

He hunah hian Ralte Villa Badminton Club, Champhai hnenah Badminton Club kumtluana chetha leh a zawna kum 3 chhung Champion nihna hauh thei chawimawina, MBA Inter Club Triple Champion 2020-2021, 2021-2022 & 2022-2023 lawmman hlan a ni bawk.