667/2022-2023

Kolasib dated 27th May 2022: Vawiin chawhma khan Kolasib District-a National Health Mission leh Reproductive & Child Health Programme 2021-22 chhunga kalpui dan thlirletna hun chu Conference Hall, DC Circuit House, Kolasibah neih a ni a. Pu John LT Sanga, Deputy Commissioner chuan he hun hi hmanpuiin Dr. Lalawmpuia Chhangte, Chief Medical Officer-in hun a kaihruai a, Primary Health Centre leh Health and Wellness Centre fai leh thianghlim endikna, Kayakalp lawmman semna hun hman a ni bawk.

Deputy Commissioner Pu John LT Sanga chuan Pathian thil siam zinga ropui ber mihring hriselna enkawl hna chu hna zahawm ber zing a ngaih a nih thu sawiin rawngbawlna rilru puchunga inpekna thuk tak neih a pawimawh thu a sawi a. Taksa leh rilrua natna nei ten beiseina sang tak nei chunga an pan khawmna thin an nih angin Health department-a thawktute chu mipuite tan an thiamna tangkai tak a hman a nih theih nan theihtawp chhuah chunga hawihhawmna leh dawhtheihna nen an hna kalpui zel turin a chah. Covid-19 hripui leng avanga harsatna hrang hrang karah pawh Kolasib district chhunga Health department-te hmalakna a fakawm thu sawiin mipui hriselna enkawl kawnga an hnathawh ah pawh mi te tan a malsawmna thlentu ni zel turin a fuih a, hmasawnna thlen tur a thil pawimawh hmasa ber chu hriselna tha neih a pawimawh thu a sawi bawk a ni.

Hun kaihruaitu Dr. Lalawmpuia Chhangte, CMO chuan Kolasib district chhunga National Health Mission leh Reproductive & Child Health Programme tlangpui sawi zauna hun neiin ‘Review Meeting’ chu inenlet nan leh insiamthat kan ngaihna lai te zirchianga hmalam pan tur a ruahmanna siamna hun tangkai a hmang turin kalkhawmte a chah bawk a ni.

Dr. RK Lalthlamuana, SMO tarlan danin kum 2021-22 chhunga nu naupai inziaklut 1,728 zinga za zela 70.26 te chu nau an neih dawn thleng enkawlna dawng turin District Hospital, CHC emaw PHC-ah an inentir a. Nau dam tak a piang 1,228 an awm laiin thi a piang 16 an awm. Kolasib, Vairengte, Bilkhawthlir, Bairabi, Kawnpui, Lungdai leh Bukpui PHC kaltlanga naupang natna hrang hrang lak a invenna vaccine la rual za zela 73.02-te chu vaccine la kim ang a chhinchhiah an ni a, thisen 4,658 endik zing ah 4 chiah Malaria vei an awm thu a tarlang bawk. National TB Elimination Programme kalpuina hnuai a sample 1,01,028 endik ah 14 chu TB vei tih hmuhchhuah a ni a, za zela 92 chu hlawhtling tak a enkawl dam an ni thu a sawi bawk a ni.

Vawiin hian PHC Kayakalp 2020-21 leh 2021-22 lawmman semna hun hman nghal a ni a. 2020-21 Kolasib district PHC Kayakalp lawmman pakhatna Kawnpui PHC, pahnihna Bukpui PHC leh pathumna Lungdai PHC-te hnen ah hlan an ni a. Kum 2021-22 PHC Kayakalp lawmman pakhatna Lungdai PHC, pahnihna Kawnpui PHC leh pathumna Bukpui PHC hnenah hlan bawk niin pakhatna hian Certificate leh Cheng nuai 2, pahnihna hian Certificate leh Cheng 94,000 leh pathumna hian Certificate leh Cheng 81,000 a keng tel a, Țumpui Health & Wellness Centre hnenah lawmman pakhatna Certificate leh Cheng nuai 1 hlan a ni. Heng bakah hian Community Health Centre, Vairengte, Health & Wellness Centre, Thingdawl leh N.Chaltlang hnenah tițha lawmman hlan an ni bawk a ni