693/2026-2027

Kolasib, 25th May, 2026: Vawiin khan DC Conference Hall, Kolasib-ah Kolasib Deputy Commissioner Pu H. Dolianbuaia hovin District Narco Coordination Centre (NCORD) thutkhawmna neih a ni.

Thutkhawm kaihruaitu DC chuan kalkhawmte chu ruihhlo buaipuitu tura sawrkar ruat kan ni tih inhriat nawn a pawimawh thu a sawi a. Ruihhlo do kawnga hma la mek tute hnathawh chu fakawm a tih thu sawiin, kohhran lam te pawhin hetiang lama tan an la chho zel chu lawmawm takzet a ni a ti a.

Hemi chungchanga hmalak zelnaah hian mithiam zawk leh tawnhriat  nei tha te chu resource person atana hman tangkai a that thu a sawi bawk.

NCORD Member Secretary, Kolasib Superintendent of Police (SP) Pu Lalrinpuia Varte chuan thutkhawm chhan sawifiahna hun hmangin ruihhlo man a harsat thu a sawi a. Ruihhlo lian tham (commercial quantity) an man thin te hi a ngawlveite atanga man ni lovin, sumdawnna atana hmanga nghet taka kalpuitu, ruihhlo ti ve ngai miah lote hnen atanga man an nih tlangpui thu a sawi a. Hemi a nih avang hian intelligence collection a pawimawh hle a, chumi atan chuan khawtlangin tan kan rual a ngai a ni, a ti. SP thusawi zawh hian aiawh lo kal hrang hrangte hnen atangin ruihhlo dona kawnga an hmalakna report ngaihthlak a ni.

Pu R. Lalnunpuia, SDPO Kolasib chuan report pein, kumin May ni 10 khan North Chhimluang khaw bulah Bolero Pick-Up (Registration No. AS11GC 5383) atangin zu (IMFL) litre 1560, a vaiin case 164 man a nih thu a tarlang a. Heng zu man te hi a rate tarlan danin (printed price) cheng 7,90,800 man hu a ni. He thil thleng chungchangah hian Vairengte Police Station-ah thubuai ziah luh a ni a, zu neitute leh a tawlhtute hi chhui zui mek an ni a ti.

Excise & Narcotics Department atanga report tarlan danin, kumin April ni 1 atanga May ni 23 inkar khan zu chi hrang hrang leh a kaihhnawih cheng 48,31,615 man hu leh Heroin cheng 38,16,096 man hu an man a. He hun chhung hian Mizoram Liquor Prohibition (MLP) Act hnuaiah thubuai (case) 541 ziah luh a ni a, NDPS Act hnuaiah case 1 ziah luh a ni bawk. Sub-Headquarters YMA, Kolasib pawhin report pein, ruihhlo dona kawng sawiho tur hian June ni 23 khian kohhran hrang hrang hruaitute nena hun hman an tum thu an tarlang a. Hemi bakah hian Golgotha Camping Centre leh TNT Kolasib aiawhte pawhin ruihhlo ngaite chhanchhuahna kawnga an hmalak dan tlangpui te an sawi bawk.Heng bakah hian Kalkhawmte chuan ruihhlo dona kawnga thawhhona tha zawk leh hmalak dan tur tha zawk an neih theih dan tur te an sawiho nghal a ni.

Vawiin thutkhawmah hian Police leh Excise department hotute bakah CMO Kolasib, Sub-Headquarters YMA aiawhte, ruihhlo ngaite enkawlna (Rehabilitation Home) hrang hrang aiawhte leh District Drug Inspector te an tel a ni.