694/2026-2027

He hun hi Pu Ngulzathuama, Election Officer chuan kaihruaiin Booth level standing committee din ngei ngei tur a nih thu leh chu committee ah chuan khawtlang hruaitu te an tel a ngaih thu sawiin, thlakhat chhung chauh hun an neih avangin a hautak em em dawn a, committee anga hma an lak loh chuan mipui tam tak tan harsatna an thlen thei dawn tih a sawi.

Pu James Lalnithanga, ERO, 23 Champhai North chuan Booth Level Supervisor leh Booth Level Officer kalkhawmte chu an mawhphurhna a san dan leh mipui ten vote an neih zelna tura mawhphurhna zawng zawng an koah a awm avangin theihtawp chhuaha an mawhphurhna hlenchhuak ngei turin kalkhawmte a fuih ve bawk.

Dr. Peter Malsawmtluanga, ERO, 25 East Tuipui A/C leh District Level Master  Trainer leh Dr Vanlalnupuii AERO 23 Champhai North A/C ni bawk te chuan kalkhawmte an zirtir a, SIR kalpui dan tur te, BLO App hman dan turte chipchiar taka ngaihthlak a ni a, SIR tih hunchhung hian Enumeration form te chu online hmanga upload a ngaihdan turte, hun tiam chhunga upload hman loh an nei a nih chuan an upload loh chin zawng chu Draft roll atanga paih tur an nih thu leh a hranpaa form lachhuak a, dil that leh a ngai dawn a, document tam tak form hian a phut tawh avangin mipuite tan harsatna tam tak a siam dawn avangin hun tiam chhunga an tih turte an hlenchhuah ngei ngei a ngaihdan te, tun tum SIR hunchhung hi chuan document thil tel ngai lovin form hmangin voter's ID nei tawhte chu ziah luh mai theih an nih avangin tan an lak nasa a tul thu te a tarlang bawk.

Special Intensive Revision 2026 ah hian voter's ID nei tawh zawng zawngte pawhin enumeration form an fillup that leh vek a ngai dawn a, BLO te'n in tinah kalin enumeration form an semchhuak ang a, BLO te vek hian an khawnkhawm leh dawn a, an bial chhunga form dahkhah dan thiam lote an pui nghal ang, huntiam chhunga Form dahkhat lo emaw thehlut lo an awm a nih chuan Electoral Draft Roll atanga paih an ni dawn a ni.