2337/2025-2026

Kolasib, the 21st Nov 2025: India ram Deputy Prime Minister hmasa ber Sardar Vallabhbhai Patel piancham vawi 150-na lawmna kal zelah, tukin khan MY Bharat bultumin Kolasib-ah India ram inpumkhatna lantir nan ‘Inpumkhatna Kawngzawh’ (Unity March) neih a ni a. He hun hi Kolasib Bawrhsap Pu Robert C. Lalhmangaiha chuan a hmanpui.

Inpumkhatna Kawngzawh hi tukin zing dar 6:30 khan tan niin, hmun hnih - Diakkawn leh Venglai atangin kawng zawh a ni a. Hmun hniha kal te hi Park Kawn-ah intawkkhawmin, Kolasib Stadium thleng kawng an zawhho a, Stadium-ah hian hun hman zui nghal a ni.

Kolasib Stadium-a hun hman hi Pu David A. Lalhmingchhuana, DIPRO chuan kaihruaiin, Pu Satlian Joy, District Youth Officer, MY Bharat chuan lawmthu sawina hun a hmang a. Khuallian Pu Robert C. Lalhmangaiha, Kolasib DC chuan thu sawiin, Sardar Vallabhbhai Patel-a’n India ram inpumkhatna atana a thawh hlawk zia leh ram tana a hnathawh langsar tak tak te a sawilang a. Kolasib leh Mizoram mipuite pawh inpumkhatna tha tak nei tura tan lak a pawimawh thu a sawi bawk.
Bawrhsap hian thusawi neih zawhah he ni puala thutiam lakna (pledge taking) hun a kaihruai nghal a ni.

He hunah hian HD Lalruatfeli hnen atangin zai ngaihthlak a ni a, Tumpui Cultural Club ten hnam lam an entir bawk.

Vawiina Kolasib-a Unity March neihah hian School hrang hrang atangin zirlaite, MUP, YMA, MHIP leh MJA member te bakah sawrkar official thahnem tak an tel a ni.