2338/2025-2026

Kolasib, the 21st November 2025: Vawiin khan Kolasib District Planning Committee (DPC) member-te an Chairman, Kolasib Bawrhsap Pu Robert C. Lalhmangaiha hovin DC Conference Hall-ah an thukhawm a. He hunah hian Mizoram sawrkarin district hmasawnna atana hmathlir thar a duan, "Mizoram District Transformation Programme" (MDTP) kalpui dan tur chipchiar taka sawiho a ni.

Meeting-ah hian Bawrhsap Pu Robert C. Lalhmangaiha chuan he hmalakna hi kum 2047-a "Viksit Bharat" tum ram thlenna tura lungphum pawimawh tak a nih thu a tarlang a. Kolasib District chhungah he programme hi hlawhtling taka kalpui a nih theih nan leh district hmasawnna a lo thlen nan department tinte chu theihtawp a tan la turin a fuih a ni.

Meeting-ah hian Pu Zoremmuana, DRO in MDTP chungchang sawiin, district hrang hrangten September 19, 2025 aṭanga thla thum chhungin District Baseline Profile (DBP) leh District Transformation Vision (DTV) an duang dawn a ni. Heng hmathlir mil hian scheme pangngaiin a huam loh leh mamawh zual phuhru turin kum tin District Catalytic Intervention Plan (DCIP) siam ṭhin a ni ang a, kum 2025-2026 atan District Catalytic Fund (DCF) cheng vbc. 1 dah a ni. He hmalaknaah hian department hrang hrang thawhhona (convergence) leh khawtlang hmasawnna tur thil thar (innovative projects) te ngaih pawimawh tur a ni.

Kolasib district chhunga department hrang hrangte chu anmahni chan ṭheuh DBP leh DTV te December ni 15 hma lama peihfela DC Office-a thehlut turin hriattir an ni bawk.