Kolasib District tana NLUP workshop ni 2 awh tur chu vawiin khan Kolasib Tumpui Community Hall-ah Pu K.S.Thanga Parliamentary Secretary for Agriculture chuan a hawng.

Hawnna thu sawiin Pu K.S. Thanga chuan, NLUP chu sawrkarin ngunthluk taka a ngaihtuah hnu a ram leh mipui tana dinchhuah pui tur nia hriat a nih avangin kan uluk hle a. Sum 1st instalment hman danah a titha leh thalote dinhmun a inhril dawn a ni, a ti. NLUP sum hi chen tur a ni lo va. Thlai chi anga chin pun tur leh dik taka hna thawh nana hman tur a ni,  a ti. Pu K.S. Thanga chuan, NLUP hi plan fel taka sawrkarin a duan nimahse a hlawhtlinna atana pawimawh ber chu vawiina kalkhawm te hi kan ni, a ti a. Khaw tin aiawha NLUP Village Level Committee kalkhawmte chu taimakna leh rilru nghet tak pu-a hna thawk turin a fuih a. Mizoten thawh peih loh kan ngah avangin kan hmel ang pu, kan tawng pawh hmang, mahse kan rilru leh ngaihtuahna ang pu pha silo, ram hmangaih lo, kan thing leh mau leh nungchate dimdawi lo an tam ta a. Heng kan unaute tia kan lo khawngaih thinte hian kan ram hi dimdawi in ta angin  en rawh se, a ti a ni. Ram nghelnghet siam a, rethei tana eizawnna bulfuk chhawp chhuak turin sawrkarin bul a tan mek a. Oil palm herna khawl factory pawh Kolasib District ah bun thuai a nih dawn thu leh bun a nih hunah a ching hmasa te tan chuan vanneihna a nih tur thu a sawi a ni.

Pu R.Liankima D.C. Kolasib in workshop hawnna hi a kaihruai a. District chhunga khaw pakhat tih loh chu khaw  tin atangin aiawh an tel kim hle a, Tlawmngai pawl leh Sawrkar Department  hrang hrang hotute bakah Line Department mite an tel tha hle.

Pu P.L. Thanga, IAS (Rtd), Vice Chairman NLUP Implementing Board chuan Power Point Presentation hmangin NLUP pian dan leh sawrkar ruahmanna tlangpui a sawifiah a. NLUP thil tum hrang hrang zingah ram ngaw, lui leh lui hnar dinthar leh a, Agriculture leh Horticulture hnuaia thlai chin te tihpun leh te a tul a ni, a ti a.

He hunah hian Kolasib District chhung khaw hrang hranga NLUP Hmuthei zat tur ruahmanna semchhuah a ni a. Village Level Committee ten NLUP hmu tlak leh tlak lo ngun taka enfiah a, hmu tlak ngei ni a an hriatte chauh DC hnena recomment turin Pu P.L. Thanga chuan a chah a. Form pawh pechhuak nghalin khawtlang hruaitute lam atanga thil tihfel a nih veleh beneficiary tur te thlan fela training pek nghal a ni dawn a ni. Khaw thenkhata mirethei ram neilo harsatna sut kian dan tur te pawh sawi ho nghal a ni bawk.

Pu K. Lalrinthanga, MLA  chuan thu sawiin NLUP hmasa pawh khan za-a 30 vel chu a hlawhtling a. Tun tum ah hian nasa taka alo hlawhtlin theihnan ruahmanna siamin mipuite rilru pawh puahchah a ni, a ti.

Pu Hmingdailova  Khiangte, MLA & Chairman, Youth Commission pawhin thu sawiin, mipuiin NLUP kan hmuah dan leh sawrkarin hlawhtling tura a buatsaih dan a inan loh vangin tih khawtlai a ni a ti a. Mizoten hna kan thawh peih loh vanga eiraltu khual kan ngah lutuk hi kan in enchian a tul a ni, a ti.

Pu Zorammuana, Secretary, NLUP Implementing Board chuan he hunah hian thu a sawi bawk. Naktuk ah Workshop hi chhunzawm in Line Department hrang hrang ten training an pe ang.

Attachment

  • Loading attachment...