Krishi Vigyan Kendra (KVK), Kolasib District in kum 2019- 2020 chhunga Kolasib District a loneitute tana hma an lak dan tur ruahmanna leh kum 2018-2019  chhunga an hmalakna thlirletna neiin vawin khan Kolasib District Scientific Advisory Committee chu KVK  Training Hall, thut khawm a ni.

Kolasib District Advisory Committee thutkhawm neih hi Scientific Advisory Committee Chairman leh Director, Agriculture Department (Research & Education) ni bawk Dr. H. Saithantluanga’n a kaihruai a. Dr. Saithantluanga chuan Scientific Advisory Committee hi KVK in kum 2019-2020 chhunga an hmalakna tur hrang hrang Capacity Building te, Farmers Training, On Farm Trial te leh thildangte thlirhova, an ruahmanna siamte chu District leh tualchhung a loneitute tan atha tawk em tih te ngaihtuah tur an ni tih a sawi a. Ruahmanna an siam zingah District leh tualchhung harsatna chinfelnana tha tawk lo a awm anih chuan SAC hian a thlak thei tih thu a sawi bawk a ni.

Agriculture Director hian ICAR, KVK, ATMA leh State Department te leh mipuite inkungkaihna chu tha zawk leh tlo zawk a kalpui a tul thu a sawi a. Agriculture chu mahni eikhawp thar ringawt ni lovin eizawnna tling, sumdawnna tling a siam a ngai tih a sawi a. KVK pawh an Trial neih te leh an hmalakna ten engtiang chiahin nge nghawng a neih tihte hriat tum turin leh On Farm Trial leh Frontline Demonstration an neihnaah te pawh nasa zawk a rilru seng leh zual turin KVK thawktute chu a chah a ni.

Vawin SAC Meeting-ah hian Kolasib District KVK Head leh Senior Scientist, Dr.Michelle C. Lallawmkimi, chuan kum 2018-2019 chhunga KVK in buh leh thlai Variety chi hrang hranga Trial an neih dante leh an hlawhtlin dante Powerpoint Presentation hmangin a report  a. KVK Scientist Carolyn Zothansiami(Soil Science), PC Lalrintluanga (Horticulture), Dr. C. Lalfakawma (Plant Protection), Lalramengi (Agronomy) leh Dr. David Malsawmdawngliana (Animal Science), Lalrinsangi(Agro – Forestry) ten kum 2019-2020 chhunga an hmalakna tur leh Trial neih an tumte chu SAC Member kalkhawmte hnenah hian Power point presentation hmangin an sawifiah a. SAC Member ten zawhna an neihte chu an hrilhfiah nghal zel a ni.