233/2022-2023
Kolasib 22nd April 2022: Vawiin chawhma khan Kolasib District Socio-Economic Development Policy (SEDP) Committee chu a vawikhat nan DC Conference Hall-ah an thukhawm a, meeting hi Kolasib District SEDP Committee chairman leh Kolasib District Deputy Commissioner ni bawk, Pu John LT Sanga chuan a kaihruai a ni.

Kolasib District SEDP Committee Chairman chuan kalkhawmte chungah lawmthu sawiin SEDP chu sawrkar flagship programme pawimawk tak a nih thu a sawi a. Kolasib District chhunga khaw tinah Village Level SEDP Committee din a ngaih thu te a tarlang a. District leh Village level SEDP committee member-te hi field a thawktu an nih angin heng member-te hi SEDP hlawhtlinna atana fawng pawimawh tak vuantu an ni, a ti a. SEDP hnuaia hna kalpuite chu a hlawhtlin ngei theih nan Committee member-te hmala turin a fuih a ni.

Vawiin meeting-ah hian Kolasib District SEDP Committee kalphung inhrilhhriatna neih a ni a, Village Level SEDP Committee din dan tur sawiho niin Village Level SEDP Committee tinah hian Chairman leh Member Secretary te ruat tur an ni a, hemi bakah hian in 250 leh a hnuai lam chin awmna khuaah prominent citizen member pathum (3), in 251-500 chinah prominent citizen member panga (5) leh in 501 leh a aia tamah prominent citizen member pasarih (7) te ruat tur an ni. Village Level SEDP Committee hi April thla chhunga din fel hman turin ruahmanna siam a ni a. Meeting-ah hian Line department- Agriculture, Horticulture, Animal Husbandry & Veterinary Services (AH&Vety), Urban Development & Poverty Alleviation (UD&PA), Fisheries, Land Resources, Soil & Water Conservation (LRS&WC), Commerce & Industries leh Sericulture atangin SEDP kaihhnawih hmalakna hrang hrang leh hmachhawpte ngaihthlak niin member-te an kalkim hle a ni.