234/2022-2023
Aizawl 22nd April 2022: Vawiin khan Sports & Youth Services changtu Minister Pu Robert Romawia Royte chuan farewell program leh IUM Virtual Fest Lenlai 2022 kharna inkhawm chu ICFAI University, Durtlangah a hmanpui.

Pu Robert Romawia Royte chuan ICFAI University atanga zirlai zirchhuak thar te a lawmpui a, an kal zelna turah duhsakna hlanin farewell program a tel tura an sawm

chu lawmawm a tih thu a sawi a. ICFAI Vice Chancellor Prof RP Vadhera nen education hmasawnna tura hun rei tak an lo thawh dun tawh dan sawiin Mizoram University atanga a chawlh hnuah Mizo thalaite a hmangaihna avanga ICFAI-ah Vice Chancellor nihna a chelh chhunzawm chu ICFAI mai bakah Mizoram tan a lawmawm tak zet a ni, a ti.

Mizoram State-ah University kan nei tlem hle a, MZU leh ICFAI lo chu tun dinhmunah University kan nei rih lo, Pu Robert Romawia Royte chuan a ti a. General line a post graduate zirna tur mamawh em em zirlai te tan course hrang hrang zir theihna ICFAI in Mizoramah zirna in tha tak an rawn din chu Mizoram tan malsawmna a ni, a ti. Post graduate degree nei thar te fuihin zirna kawng thui tak an zawh hnuah University degree an nei tawh a, eizawnna kawngah inelna sang tak khawvelah an zuang lut tawh dawn a ti a. Sawrkar hna chauh ni lo, eizawnna tlak hna thawh tur tam tak a awm tih sawiin Pu Robert Romawia Royte chuan theihtawp chhuah tur leh thawh hreh nei lo turin a fuih a ni. Minister chuan ze nghet neih te, mahni nihna anga lan ngam te a pawimawh a, Mizo zingah pawh hetiang mi entawntlak tam tak an awm, a ti a. Midangte tana malsawmna ni tur leh eizawnna kawngah pawh mi hlawhtling ni turin teirei peih a tul a, taimakna leh tumruhna tel loin mi hlawhtling a nih theih loh tih hre thar leh turin zirlai te a fuih a ni. Changkanna tehfung pawimawh tak literacy ah Mizoram kan sang hle hi mahni inrintawkna petu ni se; chutiang bawkin zirna sang tak post graduate degree nei thei hiala pass chhuak te chu chapo pui tur ni loin mahni inrintawkna petu ni se a duh thu Pu Robert Romawia Royte chuan a sawi bawk.

Kharna inkhawmah hian Pu Robert Romawia Royte leh ICFAI Vice Chancellor Prof RP Vadhera te chuan graduate tharte ngaihhruina thilpek an sem a. Lenlai Fest chhunga buatsaih Futsal lawmman sem a ni bawk. Graduate tharte aiawh hnen atangin thusawi ngaihthlak niin IUM Virtual Fest Lenlai 2022 Organising Chairmna Pu Shamim Akhtar chuan lawmthu sawina hun a hmang a ni.