235/2022-2023
Siaha; the 22nd April,2022: Vawiin chawhnu 12:30Pm khan MADC complex-ah SBI ATM booth bun thar chu District Bawrhsap Pu Lalsangliana'n mipui hman theih turin a hawng. He ATM booth hawnna inkhawm tawi hi Pu MacDonald Lalropuia, Chief Manager SBI Siaha Branch in kaihruaiin, Pu Lalsangliana DC chu khuallian a ni.

ATM booth hawnna inkhawm tawiah thu sawiin, Pu Lalsangliana chuan vawiina ATM booth thar hawn theiha a awm hi ka lawm tak zet a ni; tiin, Siaha mipui ten Bank tawt lutuk leh ATM booth tlem lutuk avanga harsatna namen lo kan tawh thin chu vawiin atang chuan nasa takin a ziaawm tawh dawn a ni, a ti.
Pu Lalsangliana chuan vawiina ATM hawn thar hian SBI leh Siaha district mipui te inzawmnaah rahbi thui tak a tuk dawn a ni; tiin,
ATM booth thar dang leh Branch thar pawh Siaha-ah hian hawn belh ngei tum turin SBI hotute a ngen nghal a ni.

Pu LP. Lalchangkima Regional Manager,SBI Aizawl pawhin a introductory Speech-ah ATM booth thar bun a harsat zia sawiin, ATM booth pakhat bun tur hian Company hrang hrang 5 lai inhnamhnawih a ngai a, Guwahati atanga engkim an lo khawih ngai bawk nen, ATM booth thar bun hi thil awlai a ni lo. Chutiang a nih mek lai leh diltu tam tak an awm laia, Siaha district in pakhat in chang hi in vannei hle a ni, ka lawmpui tak zet che u, a ti.

Pu K.Chhihrau,Executive Secretary,MADC pawhin thu sawina hun hmangin, SBI official te chungah lawmthu a sawi.

Vawiin ATM booth thar hawnna inkhawm tawiah hian MADC-a Head of Department te bakah, tlawmngai pawl hrang hrang aiawh te,Siaha MJA te, SBI Siaha Branch staff te leh sawmbik te an tel a ni.