373/2022-2023
Kolasib dated 2nd May 2022: Vawiin chawhma khan DC Conference Hall-ah a vawikhatna atan Kolasib District Skill Committee chuan thutkhawmna an nei a, thalaiten eizawnna tlak thiamna an neih theih nana District Office hrang hrangten ruahmanna, ‘Special Project’ cheng Nuai 200 hu, May ni 15, 2022 chhung a thehluh a ngaih thu tarlan a ni.

Hun kaihruaitu Pu John LT Sanga, Deputy Commissioner chuan thalai zinga thiam thil nei an tamna ram apiang chu ram intodelh leh hmasawn chak an nih thu tarlangin ziak leh chhiar thiam tamna ram, Mizorama thalaite tan hian eizawnna tlak thiam thil nei tura inchher nan leh an thiamna tihpun nan Ministry of Skill Development & Entrepreneurship hnuaiah District Skill Committee din a nih thu a sawi. DC chuan Mahatma Gandhi National Fellow-ten hun engemaw chen Kolasib district-a thalaiten eizawnna dapna kawnga an mamawh leh tlakchham an neihte zirchianna an kalpui thu a sawi a, District Office-te nen tangkawpin ‘Skills Acquisition & Knowledge Awareness for Livelihood Promotion’ kaltlangin ‘District Skill Development Plan’ duan thuai a tul thu a sawi. ‘District Skill Committee’ ruahmanna hrang hrang kalpui turte hlawhtling tur chuan School hotute, veng, khua leh District anga tlawmngai pawl leh khawtlang hruaitute an pawimawh thu sawiin Pu John LT Sanga chuan thawhhopui ah a sawm nghal bawk a ni.

Pi Pallavi Dhiman, Fellow, Mahatma Gandhi National Fellowship chuan Kolasib district chhunga ‘Skill & Entrepreneur’ chungchanga an zirchhuah tawhte tarlanna hun hmangin District Skill Committee din a nih chhan leh an mawhphurnate sawi zauna hun a hmang a. District Office hrang hranga thalaite thiamna tihpun kawnga hmalak dan tur sawi hona neih a ni. He hunah hian Kolasib district chhunga thalaiten eizawnna tlak thiamna an neih theih nan Ministry of Skill Development & Entreprenuership hnenah Cheng Nuai 200 thleng ‘Special Project’ duan a thehluh tur a nih thu tarlan a ni.

District Skill Committee-ah hian Deputy Commissioner chu Chairman niin District Urban Development Officer, Functional Manager, DIC, District Agriculture Officer, District Horticulture Officer, District Fisheries Development Officer, District Veterinary Officer, District Programme Officer, District Officer, LRS&WC, DPC, Samagra Siksha, Principal, Govt. Kolasib College, St. John’s H.S.S, CZS H.S.S, Govt. Diakkawn High School, District Development Officer, NABARD, Chairman, Jt. VC, Kolasib, President, Sub-Headquarters MHIP leh YMA, Kolasibte an tel a ni.