372/2022-2023
Aizawl the 2nd May, 2022 : Vawiin khan Mizoram Sawrkar Planning & Programme Implementation Department leh Tourism Department chuan Sawrkar Laipui Ministry of Development of North Eastern Region leh North Eastern Council te nena tangkawpin “Untapped Eco-Tourism Potential” tih thupui hmangin Aijal Club RB McCabe Hall ah Round Table Discussion an buatsaih a. India zalenna kum 75-na lawmna Azadi ka Amrit Mahotsav (AKAM) kal zelah North East Festival chu hmarchhak state tinah neih niin vawiin programme pawh hi North East Festival neih mek peng pakhat a ni a. Tourism Minister Pu Robert Romawia Royte chu khuallian a ni.

Tourism Minister chuan Mizoram Sawrkarin North East Festival hlawhtling taka a buatsaih kal mekah eco-tourism tih thupui hmangin state chhung leh pawna mithiam te ko khawma round table discussion an buatsaih thei chu lawmawm tiin, a buaipuitute leh chhimtute zawng zawng duhsakna a hlan. Mizoram Tourism Department chuan tourism hmasawn nan nasa takin hna a thawk a, COVID hripui len vanglai pawha chawl lovin thawktuten hna an thawk a, India rama a hmasa ber ni turin Responsible Tourism Policy 2020 bakah a kaihhnawih inkaihhruaina leh dan leh dun te an duang chhuak tih Pu Robert Romawia Royte chuan a sawi a. Hripuiin nasa taka Tourism Industry a tihthuanawp pawh tunah chuan lo ziaawm chhovin, Mizoram Tourism Department pawhin post covid strategy changtlung tak a buatsaih a, ram pawn leh India ram chhung atanga zin mite hipna tur ruahmanna hrang hrang a siam chho mek zel a ni, a ti.

Khuallian chuan Tourism subject in a huap zau zia sawiin Mizoram chuan sports leh adventure tourism lamah hmabak eng tak a neih thu a sawi a. Football ah te, boxing ah te leh hockey ah te Mizo thalaiten India ram an al hneh hle a, heng mi hlawhtlingte avang hian Mizoram pawhin hriat a hlawh a, Sports Tourism hi Mizoram tan chuan tih tak zeta tuipui tham nia a hmuh thu a sawi a. Adventure tourism lamah pawh kawng inhawng zau zelin state dangte neih ve loh Motosports Racing Track, Lengpui Airport bulah siam tum a ni a, Rural Electrification Corporation (REC) atangin a siamna tur sum cheng vaibelchhe 7.5 hmuh a nih thu Pu Robert Romawia Royte chuan a sawi. Tourism hi Mizoram leh India thlunzawmtu pawimawh tak pakhat a tling a, ram chhung hmun danga mite nen inunauna a siam tih sawiin Minister chuan Tourism tihlar hi sawrkarin a ngai pawimawh a, theihtawpin hma a la mek zel a ni, a ti. Vawiina round table discussion chu a chhimtu zawng zawngin hlawk taka an hman theih nan duhsakna hlanin, Mizoram Tourism hmasawn zelna tur atan thil tangkai a nih ngei a beisei thu khuallian Pu Robert Romawia Royte chuan a sawi a ni.

Tourism Minister hian Tourism Department website thar ‘mizoramtourism.com’ leh ios leh android app thar a tlangzarh nghal a. Smartphone app hi mizoramtourism.com atangin download theiha dah a ni.

Mizoram Chief Secretary Dr Renu Sharma chuan Mizoram Sawrkar Tourism Department in khualzin mite hip thei tura hma a lak dan hrang hrang a tarlang a. Environment humhalh chunga zin miten an tlawh theih tur, mihring khawih danglam loh, khuanu duansa hmun mawi leh ennawm tak tak Mizoram chhunga awm te chu eco-tourism tihlar nana thil tangkai tak a ni dawn a, uar leh zuala eco-tourism promotion ah tanlak a ngai a ni, a ti. Chief Secretary chuan eco-tourism leh tourism industry chuan state chhunga chengte tan hna tha tak a siamsak a beisei thu leh environment ti chhe thei eizawnna atanga eizawnna hlawk leh kumhlun zawka hruailut thei tura puitu tangkai a nih a beisei thu a sawi a ni.

Vawiin programme ah hian Tourism Director Pu V.Lalengmawia chuan Mizoram tourism chanchin, hmalakna leh hmachhawp te chipchiar takin a sawi a. AKAM NEC Nodal Officer Pi R.Lalrodingi pawhin NEC kaltlanga sawrkar laipuiin hmasawnna hna a thawh dan a sawi a. Kum 17 chhungin NEC chuan Mizoram tan project 160 a sanction a, heng project te atanga sum pekchhuah zat belhkhawm chu cheng vaibelchhe 1378.99 a nih thu a sawi.

Vawiin programme ah hian Tourism Secretary Pi K Lalrinzuali’n kalkhawmte lawmna thu a sawi a. INDeco Leisure Hotels Chairman Steve Borgia chuan virtual mode in thu a sawi a. Eco-tourism chungchang sawihonaah hian media lama hnathawh that avanga lawmman dawng Aditi Raval, Finderbridge Tourism Guwahati CEO Himangshu Baruah, Tourism Deputy Secretary Pi Zonunthari, Mizoram Hotel Owners Association (MHOA) Asst Secretary Pi Dolly Lalmuanpuii, Association of Tour Operators Mizoram (ATOM) President Pu Zoliana Chhakchhuak leh Travel Agent Association of Mizoram (TAAM) President Pu Lalhruaitluanga te an tel. Sawihona neih zawh hnu hian Tourism Joint Director Pu Saitluanga’n lawmthu sawiin hun a khar a ni.

Attachment

  • Loading attachment...