371/2022-2023
Aizawl the 2nd May, 2022 : Vawiin khan Azadi Ka Amrit Mahotsav "North East Festival" denchhenin Program for Roundtable on Bamboo chu Aijal Club-ah neih a ni a. Horticulture Development Board Vice Chairman Prof. F. Lalnunmawia chu khuallian a ni.

Khuallian Prof. F. Lalnunmawia chuan thu sawiin Azadi Ka Amrit Mahotsav "North East Festival" denchhena Horticulture Department in Bamboo Roundtable Discussion a buatsaih chu lawmawm a ti a. Kum hnih kalta chhungin Horticulture Department chuan pilot project atan Dendrobium brandisii leh D. sikkimensis plantation ah te tan nasa takin a la a, heng bakah hian Bamboo Link Road project pawh sawrkar laipui chuan a pawmpui tawh a ni a ti a. India ram a bamboo resources 28% hi North East India ah awmin, bamboo forest hian total forest area atanga chhutin 12.8% a zau a awh a. North East state zingah Mizoram chu bamboo diversity nei sang berin, chi 30 lai kan ramah a awm a ni a ti a. Khuallian chuan bamboo diversity-ah sang hle mah ila, bamboo development atan technology lamah te, industrial infrastructure leh thildangah te tan lak a ngai nasa a ni, a ti a. Kan rama awm, Melocanna baccifera chuan bamboo based production mamawh a phuhruk zawh loh dan te sawiin, heng avang hian sawrkar chuan large size bamboo species ah tan a la a ni a ti a. Vawiin Roundtable discussion hian rah tha tak chhuah se, sawrkar hmalakna ti phuisui a, hmasawnna tur thurawn pe thei, hmun hrang hrang atanga lokal khawmte chu sawmin, duhsakna a hlan a ni.

Pu JC Ramthanga, Addl. Chief Secretary chuan lokal te lawmna thu a sawi a. Dr Elizabeth Saipari, Director of Horticulture & Mission Director, State Bamboo Mission chuan Bamboo Mission in Mizoram chungchang a sawi a. Dr. Carmelita Lalchhanhimi Pachuau chuan Role and Potential of Bamboo a sawi bawk a. Dr. Avanish Kumar Srivastava, Director, CSIR-AMPRI hnen atangin Bamboo Composite Research and Application in the Development of North East tih ngaihthlak a ni bawk a ni.

Roundtable on Bamboo hi Pu L. Lalhmingmawia Pachuau, Joint Director, Horticulture Department chu moderator niin, Video Conference kal tlangin N.Delhi, Tamil Nadu leh hmundang atangin bamboo sector a thawktu dang te an tel bawk a. Panel-ah hian CSIR, National Bamboo Mission, CSIR-AMPRI, Manipur University, Tripura Bamboo Mission etc atangin an tel a ni.

Pu C.H Lalmuanpuia, Joint Director chuan he hun hi lawmthu sawiin a khar a ni.