Nimin khan Kolasib District Bawrhsap Pu R Zarzosanga kaihhruaina hnuaiah District task force for urban immunization (DTFUI) chu Bawrhsap pisa ah an thukhawm.

Sentut leh zerman sentut laka invenna tur measles Rubella Vaccine Campaign (MRVC) chungchang sawiho niin Campaign hi April ni 16 chawhma dar 10 ah St. Maria's School a hawn tura rel niin Project Director DRDA Pu Lalnunhlua'n a hawng ang. He Campaign ah hian School Session site 149, Outreach (Anganwadi, Sub Centre) Site 58 hnuaiah naupang thla 9 atanga kum 15 inkar mi 26666 te hnenah sentut danna pek tum a ni a, hei hi Kolasib District mihring awm zawng zawng atangin 29.8% a ni.

Sentut danna (MR Vaccine) hi him tawk tak a ni a India ram State dang lo inpek tawhna ah te pawh Vaccine inpek avanga harsatna  thleng report tur a awmloh thu tarlan a ni a, chuti chung chuan Vaccine inpek avanga harsatna (Adverse Effect following Immunization/AEFI) a thlen hlauh takin a enkawl/chiu dan tur chu Medical Officer te leh Health Worker te chu training pek an nih tawh thu tarlan bawk a ni.

Thutkhawmah hian Health Department a hotute bakah Education Department leh Social Welfare Department atangin District thuneitute an tel a ni.