2697/2022-2023
Kolasib dated 16th November 2022: Chhiatrup thlen chang a chechhuak tur te mumal tak leh tangkai tak a chetlak dan inzirtirna ‘Up-scaling of Aapda Mitra Scheme’, Kolasiba ni October ni 3 atanga ni 28 chhunga tel te hnenah vawiin khan Pu John LT Sanga, Deputy Commissioner chuan Life Vest leh Googles a hlan.

Pu John LT Sanga, Deputy Commissioner chuan chhiatrup thlen chang a midangte chhanchhuah hna thawk tur chuan rilru leh taksa hrisel neih a pawimawh thu sawiin zuk leh hmuam, ruih theih thil lak a fihlim a tul thu te, mahni thalai pui te tan a entawntlak a nun a pawimawh thu a sawi a. Chhiatrupna a thlen chang pawh a mi te tan a tangkai ni turin mahni inrintawkna, huaisenna bak ah ‘Up-scaling of Aapda Mitra Scheme’ Training-na hnuai a thiamthil an zirte chu hman tangkai a pawimawh thu a sawi.

Kolasib district chhunga YMA branch hrang hrang atangin thalai 100-te Aapda Mitra training-ah hian an tel a. Khawtlang tan a mi tangkai nitur a infuihna hun Pu Lalnunmawia, Secretary, Sub-Headquarter YMA, Kolasib atanga ngaihthlak niin Pu H.Vanlalnghaka, Chairman, Disaster Management Sub-Committee, Sub-Headquarter YMA chuan lawmthu sawina hun a hmang bawk a ni.

Vawiin hun hi Pu Lalnunfela, District Organiser, DDMA in a kaihruai a, Pu Hmingthanzuala, DIPRO leh Disaster Management Sub-Committee, Sub-Headquarters YMA, Kolasiba hruaite an tel a. Vawiina hmanrua inhlan bak ah hian chhiatrup thlen chang a tangkai tur hmanrua engemaw zah Aapda Mitra te hnenah hian pek tawh niin Life Insurance tih sak tur a hmalak mek a ni bawk.