2696/2022-2023
Aizawl the 16th November 2022 : Vawiin khan Irrigation and Water Resources Department (IWRD) Minister Pu C.Lalrinsanga hovin IWRD hotute leh Mizoram Journalist Association (MJA) hruaituten IWRD Conference Room, MINECO ah inkawmhona hun an hmang a. IWRD hmalakna pawimawh tak National Hydrology Project (NHP) chungchang inhrilhhriatna hun an hmang a ni.

Minister Pu C.Lalrinsanga chuan IWRD hian ram hnuk khawih thil, kan ram intodelhna tur atana thil pawimawh khawih a ngah hle a, hmalakna hrang hrang a kalpui mekah te hian hmasawnna hna thawktu sawrkar department dangte nen inkungkaihna leh inthlunzawmna a ngah hle a ni, a ti. National Hydrology Project kalpui mek hian vawiina kan dinhmun hmachhawn mek chauh ni lo, nakin zela thangthar te hmakhua atan a la pawimawh dawn chauh a, environment thlenga nghawng thei tur thil a nih avangin a pawimawh hle a ni, Minister chuan a ti a. NHP kaltlang hian kan ram leilung enkawl dan tur a lang chho dawn a, tui hna kang zel leh tui tlem telh telh tihpun dan tur kawng te kawhhmuhin, lo neitute tan malsawmna a thlen thei dawn a ni, a ti bawk.

National Hydrology Project in a tum ber chu ram chhunga tui hna leh tui lakna water resources hrang hrang te technology hmanga zirchiang a, data rintlak lakkhawm leh tangkai taka hman a nih theih nana phochhuah a ni a. India ram state hrang hrang atangin kalphung inang hmang tlangin India-Water Resources Information System (India-WRIS) ah data thehluh a ni ang a. Mizoram chuan Mz-WRIS (Mizoram-Water Resources Information System) hmangin a thehlut dawn a ni. Heng atanga data rintlak lut khawm hi mipui a duh apiangin a thlawnin an hmang tangkai thei dawn a. State sawrkar thuneituten ram kalphung tur an duanna kawngah hriatna thuk zawk pein thutlukna tha siam turin a pui a nga, a bik takin lo neitute tan a tangkai lehzual tura ngaih a ni a, research scholar te tan leh mipui mimir tan pawha hman tangkai theih tura duan a ni.

NHP hi sawrkar laipui hmalakna Central Sector Scheme niin a sum senso hi sawrkar laipuiin za ah za a tum a. Kum 2016 khan he project hi lo piangin 2024 thleng kalpui tur a ni a, India rampum huapa hmalak niin Mizoramah chuan IWR Department hi kengkawh tura mawhphurhna pek an ni. NHP hnuaiah hian Mizoram tana sum ruahman zat chu cheng nuai 3277 a ni a, sum cheng nuai 1852.25 hmuh tawh niin cheng nuai 1735.29 hman ral a ni tawh a ni.

Tun dinhmunah NHP kaltlangin Mizoramah Hydro-Met data station 53 bun mek a ni a, 6 dangah bun leh tura inremna thuthlung ziah a ni tawh a. Ruahtui tla zat tehna Automatic Rain gauge chu hmun 27 ah dah tawh a ni a, automotatic weather station hmun 10 ah dah niin 8 bun fel a ni tawh a, leihnuai tui awm zat hriatna piezometer chu hmun 20-ah bun tum niin hmun 10 ah zawh a ni tawh a, tui luang tehna gauging & discharge station hmangin lui sawmhnih pahniha hmun 27-ah teh tum niin hmun 16 ah zawh fel tawh a ni. Heng station atanga data lak khawm hi IWRD CE office-a Data Centre, Aizawlah darkar tin khawl hmanga thawn reng a ni tawh a ni.

Inkawmhonaah hian IWRD Chief Engineer Pu Lalrotluanga leh official dangte an tel a. MJA te hi an President Pu C.Lalrambuatsaiha hovin Executive Committee Member te an tel a ni.