214/2026-2027

Kolasib, 20th April, 2026: Vawiin khan Kolasib DC Conference Hall ah District Local Administration Office (DLAO) Kolasib buatsaihin Kolasib District chhunga Village Council (VC) te hnenah Rashtriya Gram Swaraj Abhiyan (RGSA) scheme hnuaia computer set dawn te sem chhuahna hun hman a ni a. He hun hi Kolasib Deputy Commissioner Pu H. Dolianbuaia chuan Khuallian niin a hmanpui.

Khuallian, Kolasib DC Pu H. Dolianbuaia chuan thu sawiin, Local Administration Department chu amah nen pawh inzawmna an lo nei tawh a ni tiin, Joint Secretary pawh a lo nih tawh thin thu a sawi a, vawiina hetiang hun hman a ni chu a lawmawm takzet a ni, a ti. Hmasawnna kawngah VC ten tihtakzeta an khua an enkawl chuan khawtlang a changkang thin a ni, a ti a. Khawtlang hmasawn zel nan District Administration pawhin theih anga VC te hmalakpui zel a tum thu a tarlang. DC chuan vawiina computer sem chhuah te chu a dawngtu VC ten hmang tangkai turin a chah a, information leh data vawn that nan te leh thil pawimawh dang atana an tangkaipui ngei a beisei thu a sawi bawk.

He hunah hian Dr. Lalngura Tlau, Director, LAD pawhin thu sawiin, computer set te hi RGSA scheme hnuaia sawrkarin VC te a pek a nih thu a sawi a. Kolasib District chuan RGSA scheme kal hmasa zawkah computer an lo dawn nual tawh avangin vawiinah hian dawng an tam lo a ni, a ti.

Director chuan VC te hmasawn zel na tura Department hmalakna te tarlangin LAD Department chuan 15th Finance Commission atanga sum hmuh theih te chu a bo a bang awm lovin an hmuh thu sawiin, District Panchayat Resource Centre (DPRC) chu district 8-ah a awm tawh thu leh, Aizawl, Lunglei leh Kolasib ah te a hmun zawn mek a nih thu a sawi a, hei hi district-a VC ten an zin changa an chawlh leh an riahna tur, an hman tangkai em em thin a ni, a ti.

Hmeichhe representative te chungchang sawiin, Mizoram puma hmeichhe VC te tan thla tharah Chief Minister hovin training neih tum a nih thu a tarlang a. VC te dinhmun pawimawh zia tarlangin, grassroot level-a mipuite chhia leh tha thlen khawmna leh hmasawnna kailawn an ni, a ti. VC member graduate chin te chu IIM Shillong-ah kar khat chhung training neih tir an nih thu sawiin, Mizoram chhunga VC te intlawh tawnna leh hmalak dan tha (best practice) in zirtir tawnna buatsaih tum a nih thu a sawi bawk.

Pu Lalchawimawia, Joint Director (Admin), LAD pawhin thu sawiin Rashtriya Gram Swaraj Abhiyan (RGSA) chungchang sawifiahna hun a hmang a. RGSA hi Central sawrkarin thinglang khuate anmahnia kea an din theihna atana a ruahman, VC te thiamna leh theihna ti punga hnathawk thei zawk an nih theih nana duan a nih thu a sawi. He scheme hi kum 5 chhung awh tur a ni a, 2023-26 hi Revamped RGSA niin 15th Finance Commission nena kal kawp tura ruahman a ni, a ti. State Panchayat Resource Centre, Aizawl leh SIRD ah te training neih thin a nih thu sawiin, Kolasib District ah Panchayat Bhavan 5 sak tawh a nih thu leh 2 sak tura ruahman mek a nih thu a tarlang. Kum 2025-26 atana computer set 346 zet lei a nih thu leh, tunah hian 98 sem mek a nih thu a sawi bawk.

Vawiin hun hi Pu Lalmuanpuia, DLAO Kolasib chuan a kaihruai a,  Kolasib district chhunga VC pathum - Hortoki-II, Phaisen leh North Chhimluang VC te hnenah computer hi hlan an ni. He hun hi Pu Lalhmingmawia, Joint Director, LAD chuan lawmthu sawina in a khar a ni.