215/2026-2027

Dated Serchhip, the 20th April, 2026: Serchhip khawchhung tih hmasawnna tur leh kumin October thlaa Serchhip Leisekawt Field-a neih tur, Rampum Huap Kohhran Pavalai Pawl (KPP) Inkhawmpui atana inpuahchahna ni pahfawmin, vawiin khan Serchhip Bawrhsap Pu Paul L. Khuma hovin DC Meeting Hall-ah thutkhawm a ni a. He hunah hian P&E Village Council hruaitute, KPP Organizing Committee hruaitute leh sawrkar official-te an tel a; mikhualte tana nuam zawka hmunhma buatsaih dan tur hrang hrangte sawi ho a ni.

Pu F. Lallawmkima, Superintendent, Deputy Commissioner Office hnen atangin field endikna Inpection kalpui dan leh ruahmanna hrang hrangte ngaihthlak a ni a. Mipuite’n zan thimah pawh him zawk leh hahdam zawka Leisekawt Field an thlen theih nana, Serchhip IOC veng leh Bazar veng inkarah kawng tih enna (street light) vuah belh chungchang te, Pavilion chei that dan tur chungchang te, Pavilion bula vantlang inthiarna chei that dan turte leh Tennis Court bula inthiarna siam belh chungchangte, BDO quarters thlang zawla chawlh hahdamna lailawk siam chungchangte rel a ni a; Field hungna lungremte pawh mawi zawka rawng hnawiha chei thar tum a ni bawk.

Bawrhsap Pu Paul L. Khuma chuan heng hmalaknate hi Serchhip khua tana hmasawnna pawimawh tak a nih avangin chak taka bawhzui a nih tur thu a sawi a. Khawtlang hruaitute leh Pavalai hruaitute pawhin sawrkar hmalakna leh thawhpuinaahte lawmthu sawiin, khawtlang hmasawnna atana hma lakna hrang hrangahte theihtawp chhuaha thlawp zel an inhuam thu an sawi bawk a ni.