Vawiin khan Kolasib District huam chhunga sawrkar laipui bultum thingtlanga hmasawnna scheme leh programme hrang hrang kalpui mekte ennawn leh thlithlaia, an thlen tawh chin leh harsatna an tawhte sawiho turin Kolasib District Vigilance & Monitoring Committee chu Chairman Lok Sabha MP Pu C. L. Ruala leh Co-Chairman Rajya Sabha MP Pu Ronald Sapa Tlau hovin Kolasib DC Conference Hall-ah an thukhawm a. He meeting ah hian Parliamentary Secretary Pu K. Lalrinthanga leh Pu P. C. Zoram Sangliana te chu an tel a. He Committee Member Secretary leh Kolasib DC ni bawk Pu Jitender Yadav bakah District Rural Development Agency (DRDA) Kolasib, Project Director leh a thawhpui te leh Kolasib District a Centrally Sponsored Schemes (CSS) kalpuitu Line Department hrang hrang aiawhte an tel bawk a ni.

Lok Sabha MP Pu C.L. Ruala chuan Sawrkar Laipuiin CSS scheme hnuaia sum pek dan 90:10 chu siam danglam a 50:50 anga kalpui an tum hi, an tih tak tak chuan hnathawh ngaihna a vang dawn a, hmasawnna hna tam tak tak kal mekte a khaihlak dawn a, tun dinhmunah chuan kal dan tur hriatthiam a har a ni, a ti. Parliamentary Standing Committee-a a tel naah te CSS scheme ah chuan za a za (100 percent) Sawrkar Laipuiin tum sela tia vawi tam tak a thlen tawh thu sawiin he thilah hian Hmarchhak MP te pawh an tangrual hle a, mahse tun thlengin engmah thu chiang a la awm lo nia a hriat thu a sawi bawk.

Rajya Sabha MP Pu Ronald Sapa Tlau chuan Kolasib District-a nausen thi(1000 zelah), Infant Mortality Rate nikum a 34 atanga Apr-June 2015 quarter a 17.5 a tlahniam chu thu lawmawm nia a hriat thu sawiin, kumina Saiha District-a IMR sang rawn zirchiang tura lokal Central mithiam te chuan nu naupai ten zuk leh hmuam, kuhva, sahdah leh khaini an tih thing avangin heng hian an nau hrin naah an dinhmun a ti thalo hle nia an hmuhchhuah thu leh hei hi IMR a sanna chhan lian ber nia a ngaih thu a sawi.

Vawiina District Level Vigilance & Monitoring Committee ah hian thingtlang tihhmasawn nan leh a chengte chawikanna atana sawrkar laipui scheme hrang hrang – ni za inhlawhna Mahatma Gandhi National Rural Employment Guarantee Scheme (MGNREGS); thingtlanga mirethei te chenna in sak sakna Indira Awas Yojana (IAY); ram chhengchhia cheibawl leh enkawlna Integrated Watershed Development Programme (IWMP); thingtlang inkalpawhna kawng sial Pradhan Mantri Gram Sadak Yojana (PMGSY), National Urban Livelihood Mission (NULM) leh scheme dang te hnuaia hnathawh leh hmalak dan, sum an hmuh hman dan te chipchiar taka thlir hoin harsatna thenkhat awmte chu a kalpuitu Department aiawhte leh he Committee Member ten tarlangin chung harsatna te chu an sawiho a ni.

Meeting-ah hian hriselna kawnga Kolasib dinhmun chu CMO, Kolasib chuan a tarlang a. Kumin April- June quarter-ah nausen piang 282 an awm a, heng zinga 250 te chu Sub-Centre, PHC/CHC leh dawmdawiina piang an ni a, hemi hun chhung hian nausen thi, IMR rate(mi sangkhat zelah) 17.5 a ni a. Kawnpui leh Bairabi ah te malaria vei an tam bik nia an hmuhchhuah thu te pawh a tarlang bawk.

RMSA Kolasib hnuaiah tun thlengin sawrkar high sikul 8 sak that a ni tawh a, RMSA in khaw 8 ah sikul thar an sa a, heng sikul zinga 6 chu sak zawh tawh niin a dang pahnih pawh sak zawh tep a ni. SSA Kolasib chuan sikul kai lo naupang 322 an chhinchhiah tan special course pe in zirna an kalpui mek a. Vohbik naupang 529 chhinchhiah zinga 517 te chuan sikul an kai mek bawk a ni.

NULM hnuaia Kolasib khawpui chhunga Self Help Group 44 ziahluh a ni a, khawpui mirethei thiamthil siamsak/tihpun theih mi 194 te chu training pek mek a ni a. Sports Complex sak mek chu hna za zelah 26 vel zawh anih tawh thu tarlan a ni bawk.

Vawiin meeting ah hian Kolasib DSCO pawh telin National Food Security Act hnuaia Kolasib District chhungah mi 53,940 tuam anih tur thu leh thingtlang-ah chuan za zelah 81.88 leh khawpui ah za zelah 48.60 te chu he dan hian a huam tur thu tarlan a ni.

Kolasib District ah hian job card nei 17749 an awm mek a. Ni 11 inhlawhna siamsak ni tawhin September leh October chhung hian ni 26 dang tan inhlawhna siamsak tum mek a ni bawk.