Kolasib District chhung Assembly constituency pathuma inthlan vote chhiar turin engkim peihfel tawh a ni a, vawiin khan Vote chhiarna hmun tur Revenue Office chu Election Observer pathum Narmdeshwar Lal, IAS, Venkatesh Sharma, IFS leh CS Rao, IFS ten an tlawh a. Inthlan result puang tura Kolasib District Election Officer in inpuahchahna a neihte chu lungawi thlak an tih thu an sawi a ni.

DEO & DC Pu Jitender Yadav, IAS chuan inpuahchahna hrang hrang an kalpui dan Election Observer tehi a hrilhfiah a. Tarlan tawh angin Kolasib District chhunga A/C bial pathuma vote tehi 4-Tuirial chhiar hmasak ber a ni ang a, 5 Kolasib- in dawtin 6 Serlui chhiar chhunzawm leh a ni dawn a ni. Counting Hall-ah hian Counting table 12 siam a ni a.Counting Supervisor, counting assistant leh Micro observer ten EVM a Vote tlate hi an chhiar ang a, heng vote chhiarlai tehi counting agent ten daidanna tha tak siam atangin an thlir thei dawn a ni. RO leh ARO ten vote chhiarlai hi an vil ang.

Counting Hall-ah hian ruahmanna uluk taka siamin Observer room, Media room tepawh felfai taka siam a ni a. Venhimna pawh uluk taka tih a niin mipui tuma chim theihloh tura tih a ni bawk a ni.