4957/2025-2026

Kolasib, March 23, 2026: March ni 21, 2026 khan Kolasib Forest Division chuan an hnuaia Forest Range pakua (9) theuh ah te 'International Day of Forests' an hmang.

He ni hman chhan ber hi mipuite zingah ramngaw pawimawhzia thehdarh leh, a chhawmdawl leh humhalh zawnga nun phung inzirtir a ni a. Village Council, Biodiversity Management Committee, school naupang leh tualchhung mipuite huapin inzirtirna (awareness programme) hrang hrang neih a ni. He ni hmanna hmun hrang hrang ahte hian sik leh sa inthlak leh nungcha leh thlai chi hrang hrang humhalhnaah leh eizawnna atana ramngaw tangkaina leh pawimawhzia te uar taka tarlan a ni.

He ni pual hian hmun hrang hrangah Farmers' Association te nena tangkawpin hnim sam fai leh thing phun hnatlang neih a ni a. Heng hmalaknate hi ramngaw hriselna chawikang tur leh, ramngaw siamtha leh tura mipuite tel ve theihna tura buatsaih a ni.

He hunah hian ramngaw  humhalh leh enkawl hnaa thawkrimtute inpekna hriatpuina atan field-a hna thawk (uniform nei lo) staff-te hnenah hnathawhna thuamhnaw (field dress) sem a ni bawk.