Vawiin khan Govt. Middle School Kolasib chuan an school kum 60-na Diamond Jubilee an lawm a. He nun hi Pu Lalthuamluaia Sailo, Jt. Secy, Sport etc. he school Managing Board hmasa ber fapa chuan khuallian niin a hmanpui. Pu B.Lalchhuanliana, Jt. Director School Education chuan khualzahawm niin a hmanpui bawk.
Govt. Middle School Kolasib hi kum 1950 khan mi thahnemngai tangrualin an din a, kum 1961 ah sawrkar school ah hlankai a ni. He School atang hian mi hmantlak tamtak an lo chhuak tawh a ni. Khuallian Pu Lalthuamluaia Sailo chuan Diamond Jubilee lungphum a hawn zawha thu sawiin alo zir chhuahna sikul in Diamond Jubilee hial hmanga hmasawnna tamtak a nei chu a lawmpui thu a sawi a. Mizoramah Free & Compulsary Education, zirna her danglam tur hman a ni dawn a. Hei hi India ram mite zawng zawng chawikanna tur a niin, zirtirtute pawhin kan kalpui danah fimkhur taka kan kalpui a ngai dawn a ni, a ti a. Education Reforms Committee pawhin hemi dung zui hian recommendation a siam dawn a. Kalphung a danglam nasa dawn a. In lama kan fate enkawl ang maiin sikulah duat takin zirtirtuten an enkawl dawn a ni, a ti.

Pu B. Lalchhuanliana, Jt, Director, khualzahawm chuan, Kolasib Govt. Middle School chu tun ang dinhmuna hlangkaitu a nih avanga lawmthu leh duhsakna hlanin, kalphung tharah zoram zirna a danglam hle dawn a. Zirtirtu leh naupangte inkar boruak tha tak hnuaiah zirna kalpui a ni ang a, sawrkar laipuiin guideline a siam ang chuan zirlai chuan a zirtirtu chu a nelin a ngai hle ang a, sikul a kal a chak em em tawh dawn a ni, a ti a. Zirlai bu chhung bel taka zir satliah mai ni lovin, a taka hriatthiamna hmanga naupang chu hrual a ni dawn a, a phurawm hle a ni, a ti. Sawrkar laipuiin kan hmakhaw that nan kawng hrang hrangin programme leh scheme te a duang hi kan vanneih zia khua leh tui ten kan hriat a tul a ni, a ti bawk.

Diamond Jubilee lawmna ah hian Pu C.Lalrinkima, Headmaster chuan inlawmna thu a sawi a. Sikul din tirh kum 1950-a zirlai la dam mi 8 te chu special guest niin chawimawina thilpek hian an ni. Headmaster lo ni tawh zawng zawng te, zirtirtu lo ni tawh te zahna hun hman a ni bawk. Zirtirtu leh zirlai boral tawhte sunna hun hman a ni bawk.

School naupang ten zai leh lam, recitation te entirin hun hlimawm tak hman a ni a. He hunah hian he school-a zir chhuak tawh te, sawm bikte leh sawrkar department mite an tel tha hle a. Tlaiah Jubilee ruai kil a ni.