Kolasib District Joint Verification Team te chu an Chairman DC Pu Jitender Yadav, IAS hovin vawiin khan a office chamber-ah an thukhawm a. Khaw chhunga chhiatna thlen thei thil thenkhatte thlir hovin sawihona hun an nei a ni.

Pu Jitender Yadav chuan khaw chhung In leh hmunhma atana hlauhawm thei Thing lian ding leh thil dangte chu he Joint Verification Team hian a ngai pawimawh hle a ni, a ti a. Complaint thehluh apiang chu rang taka endik thin a, a thla fel taka lak hnuah Committee-ah pharh thin nise, a ti a. Thil felhlel chu team member te rem tih tlannaa kih leh a tul anga dah that zel nise tiin vawiina Committee hian a ti bawk a, thing kih vanga buaina tawk thei Deptt, P&E, Telecom, etc te chu heng hunah hian hriattir thin nise an ti a ni.

Project Veng chhunga Thingdawl kung kit tura ngenna leh Venglaia mimal In bula Thingdawl kung lian tak kih dilna chu Committee hian an sawi hova. Heng thingte hi a thla lak a mihring leh chenna In atana an hnawk ngei a ni tih tarlan a nih hunah kih a thenfai nise tiin Committee hian thu an titlu nghal a ni.