Vawiin khan Pu R.Romawia, Land Revenue, Higher & Technical etc. Minister leh bialtu MLA ni bawk chuan a bialchhung a mi Selesih a tlawh a. Local Council ten lo dawngsawngin, in kawm khawmna hun Selesih YMA Library-ah buatsaih a ni a. Tlawmngai pawl hrang hrang ten khawtlang mipui aiawhin, khawtlang duh leh mamawh te bialtu MLA hnenah hian an lo thlen a ni.

Pu R.Romawia chuan bial mipuite duhsakna leh tawiawmna avanga minister dinhmun hial luahthei a ni tih sawiin, ‘min puihna zawng zawngah lawmthu ka sawi tak zet a ni,’ a ti. Selesih khawtlangin an mamawh leh harsatna an thlen te chu a theih ang tawka sutkian dan zawn zel a tum thu a sawi a. Tangrual taka khawtlang leh bial hmasawn zel nan thawhhona tha tak an neih zel a beisei thu a sawi bawk. A bial mipuite tui lama an harsatna te chu a hriat thu sawiin, Pu R.Romawia chuan sutkian nan PHE lamin theihtawp an chhuah mek thu a sawi.

PWD, PHE leh P&E lam atanga bialtu SDO leh JE ten Minister hi tawiawmin, hmalak mek dan te an sawiho a ni.