132/2023-2024

Kolasib dated 18th April 2023: Vawiin chawhnu khan DC Conference Hall, Kolasibah Mizoram Governor Office kaltlanga tanpui ngaite tan a chhawmdawlna, ‘Governor Discretionary Grant’ chu Kolasib khaw chhung a ruihhlo ngai, fahrah leh pianphung a rualbanlo enkawlna Home pathum ah pek an ni a. He hun hi Pu Lallawmawma, Addl. DC in kaihruaiin Enna In (Boys Home), TNT leh Audrene Scism Children Home enkawltute hnen ah tanpuina hi pek an ni.

Pu John LT Sanga, Deputy Commissioner chuan midangte tan a mahni hun leh tha senga inpekna chu rawngbawlna ropui ber a nih thu sawiin Kolasib khaw chhunga naupang chanhai fahrahte, ruihhlo vanga enkawl ngai leh rualbanlote duat leh hmangaih tak a enkawltute chu fakawm a tih thu a sawi a. Kolasib district chhung a Home hrang hrang pan thintute tibeidawng lo a tha tak a enkawl hna kalpui a nih theih nachhan chu thawktute inpekna bak ah tlawmngai pawl leh mimal inphal tak takte vang a nih bawk thu sawiin thawhhona tha tak a awm thin chu lawmawm a tih thu a sawi.

Governor Discretionary Grant hian pawisa fai Rs. 25,000 a keng tel a, a hlanna hun ah hian DC pisaa thawktute, District Office hotute leh tlawmngai pawl hrang hrang hruaitute an tel a. Tanpuina dawngtute hnen atangin lawmthu sawina leh an Home enkawlte dinhmun tarlanna hun an nei bawk a ni. Enna In (Boys Home) ah hian enkawl lai mi 17 an awm mek a, TNT, Khuangpuilamah mi 272 leh Audrene Scism Children Home-ah naupang 34 an awm mek a ni.