133/2023-2024

Aizawl the 18th April 2023: Sawrkar laipui Union Cabinet thukhawmin 2020-a a lo pawm tawh National Education Policy (NEP) zirhona ni-2 awh tur chu vawiin khan Mizoram Rural Bank Auditorium Hall, MINECO-ah hawn a ni a. He symposium hi Planning & Programme Implementation Department, Higher and Technical Education Department leh School Education Department tangkawp buatsaih niin School Education Department changtu Minister Pu Lalchhandama Ralte chuan hmanpuiin a hawng nghal.

Minister Pu Lalchhandama Ralte chuan NEP-2020 hlawhtlinna tura symposium buatsaih a ni chu lawmawm a tih thu a sawi a. Sawrkar laipui in a ngaihpawimawh em em NEP-2020 bawhzui kawngah Mizoram sawrkar in nasa takin hma a la mek a; hripui leng karah pawh theihtawp an chhuah reng thu a sawi. Minister chuan NEP-2020 chu Department hrang hrang nghawng leh kaihhnawih a nih avangin thawhhona tha a tul hle a ni tiin symposium chuan rah tha a chhuah ngei a rin thu a sawi bawk. Ram chhung leh pawn zirna ngaituahin Mizoram a zirna chu a standard a hniam bik lo tiin hmasawn ngaihna erawh a awm thu a sawi bawk.

NEP-2020 chuan thiamna tak tak pawchhuak a, zirlaiten chhawrtlak thiamna an neih chu a ngai pawimawh hle a ni, a ti a. Zirlai naupangte chochhuaka phur taka an zir theih nan school nuam leh chhenfakawm siam kawngah Sawrkar in hma a la nasa tih a sawi a; zirlai naupang ten ngaituah thiamna (creative potential) an neih theih nan te, zirtirtute dinhmun siam tha a, an zahawmna vawng him thar tur te in hmalakna kalpui zel a nih thu a sawi. Taksa insawizawi leh Games and sports lamah pawh nasa taka hmalak mek a ni tiin skill development chu NEP-2020 thiltum pawimawh tak a ni, a ti bawk.

Minister chuan kalkhawmte chu mahni zawn theuhah theihtawpa hma la turin a fuih a, Sawrkar-ah mipuiin rinna an nghat ngam tawh chu lawmawm a tih thu sawiin Sawrkar school-ah admit sen loh zirlai an awm tawh thu a sawi bawk. NEP-2020 bawhzuina kawngah chak zawka kalpui a nih theih nan kalkhawmte chu an ngaituahna hmang thar theuh turin a sawm a ni.

Vawiin programme-ah hian Planning and Programme Implementation Department Secretary Pu Lalmalsawmna Pachuau in lawmna thu a sawi a. Resource person hrang hrang ten a hnuaia thupui hmang hian zirtirna pein sawihona neih nghal a ni.
1) Pi Carolyn Rinthanpuii Fanai, Deputy SPD, Samagra Shiksha Mizoram & Nodal Officer NIPUN Bharat Mission- ‘NIPUN Bharat Mission- 5 year perspective plan for Foundational Literacy & Numeracy (FLN)’
2) Pu Lalhmachhuana Additional Director, School Education Department & SPD Samagra Shiksha Mizoram- ‘Status Review and Way forward for Implementation of 5+3+3+4 Pedagogical Structure recommended by NEP-2020’
3) Pu H.Lalhruaitluanga, Additional SPD, Samagra Shiksha Mizoram –‘Re-imagining Vocational Education’
4) Pi Lalduhawmi Thomte, Deputy Director, SCERT & Nodal Officer, NEP- ‘Teachers and Teacher Education as envisioned under NEP-2020’
5) Pu F. Lalliansanga, SCERT Deputy Director- ‘Assessment and Examination Reforms under NEP-2020: Key Principles, recommendations and way forward’

NEP-2020 bawhzuina kawnga zirhona ‘symposium’ hi naktuk ni 19 April ah Higher & Technical Education Department huaihawtin a hmun ngaiah neih chhunzawm leh tur a ni a. Resource person ten thupui hrang hrang hmangin presentation pe leh in zirhona neih leh tur a ni a, naktuk a thupui hrang hrang tur te chu:
1) Prof. Benjamin Lalrinsanga, Nodal Officer NEP, Higher & Technical Education Department – ‘NEP-2020: Where we are now?’
2) Prof. Lalhmasai Chuaungo, Dean, School Education & Chairman Taskforce Committee for NEP-2020, Mizoram University-‘Transformation of Higher Educational Institutions in Mizoram in the light of NEP 2020’
3) Prof. Lalnilawma, Head, Department of Extension Education & Rural Development and Nodal Officer NEP-2020 in Mizoram University-‘Curriculum and Credit framework under UG Programmes under MZU in the light of NEP-2020’
4) Prof. Zaithanzauva Pachuau, Head, Department of Physics & Director, Open Distant Learning, MZU- ‘Open-Distant Learning & Online Programme in Higher Educational Institutions of Mizoram’
5) Pu Laltanpuia, Joint Director QAC, Higher & Technical Education Department-‘NEP-2020: Implementation strategies & way forward’ te a ni.

Naktuk programme-ah hian Mizoram Chief Secretary Dr. Renu Sharma chu khuallian niin thusawina hun a hmang dawn bawk a; Pu Lalmalsawma Pachuau Secretary Planning & Programme Implementation Department in lawmthu sawina neiin hun a khar dawn a ni.