No.5353/2020-2021

Kolasib 23rd September 2020: Vawiin chawhma khan DUDO Conference Hall, Diakkawn, Kolasibah Solid Waste Manangement Bye-Laws tihpuitlinna atana bawlhhlawh thliar hranna tur, tawih thei leh tawih thei lo dah hranna bawm semna hun hman a ni a, Dr H Lalthlangliana, Deputy Commissioner in he hun hi hmanpuiin Pu Gaston Vanlalhriatpuia, District Urban Development Officer, Kolasibin hun a kaihruai a ni.

Dr H Lalthlangliana chuan Aizawl khawpui tih lovah chuan Kolasib chu Solid Waste Management Centre awmna hmasa ber khua a nih thu sawiin October thla chhunga a taka hman tan beisei a nih thu a sawi a,” Kolasib chu khaw thleng rem tak a ni a, Solid Waste Management Centre kan nei bawk a, hemi Centre tangkai tak a hman a nih theih nan inkaihhruaina dan kan nei tawh bawk a, Mizoram chhunga khaw fai ber kan ni thei a ni,” a ti. Deputy Commissoner chuan Village Council hruaitu kalkhawmte chu khawtlang faina kawnga hruaitu leh kawhhmuhtu nih tum theuh turin a chah a, vawiin a tawih thei leh tawih thei lo thliar hranna bawm pawh a nihna tur ang tak a hman a nih theih nan tha taka bawhzui turin a chah bawk a ni. DC chuan bawlhlawh siam tlem zawng a chhungtin inzirtir a pawimawh thu a sawi a,” Khaw fai leh thianghlim kan hriatte hi khawtlang tangrual leh thawhhona tha awmna a ni zel a ni,” a ti a, thawhhona boruak tha nena khawtlang faina kawng a hma la turin kalhkawmte a sawm bawk a ni.

Kolasib khaw chhunga Village Council 17 hnenah bawlhhlawh bawm, tawih thei (a rawng hring) leh tawih thei lo (a rawng pawl) dah hranna hi sem a ni a, in 7,662 hnenah pekchhuah a ni dawn a ni.