Mizoram khawpui fai in elna kal zel ah vawiin khan UD&PA Department Kolasib leh Sub-Hqrs YMA Kolasib tangkawpin kolasib khawpui tui tlan ‘Tuichhuahen’ hnar thenfai hnatlang neih a ni.

Hnatlang neih tan hma hian inkhawm tawi UD&PA Office kawt ah buatsaih a ni a. He huna khuallian Kolasib Bawrhsap Dr.Arun T, IAS chuan Kolasib khawpui tui tlan ‘Tuichhuahen’ hnar thenfai hnatlang neih tura ruahman ani chu bultanna pawimawh tak a nih thu sawiin, Tuichhuahen chu khawpui tlan tuihna pawimawh tak an nih avangin uluk taka enkawl a tul thu a sawi a. Polythene tuia inchiah, hlo thahna atana kan hman te chuan tur hlauhawm tak an pai a, mumal taka sawngbawl anih loh chuan a tur hlauhawmte chu keimahni bawkin kan tlan leh thin a ni tiin dihmuntlangah mumal taka bawlhhlawh sawngbawlna hmun a awm a , chumi hmuna paih tur chuan UD&PA in bawlhhlawh paih motor a tlan kual tir thin a, heng te hi hmang tangkaiin duh duh na hmuna bawlhhlawh paih mailo turin mipuite a chah a ni.

Hemi bakah hian kawr kama vawk vulh hi an tam em em a, heng vawk thli bakah mihring thli mahni kawmthlanga luantir mai hian tuitling hrisel lo tak siamin malaria, sentut, vut natna bakah natna chi hrang hrang lakah kan derthawng (him lo)  em em ani a ti a, khawpui rimchhia leh boruak hrisel lo hi a khaw chhunga cheng mihring te bawkin kan siam thin a, bawlhhlawh paih mai mai, chil chhah mai mai, kuhva ei na chil chhah te bakah khawlaia meizial tihkhuk luih luih te hian khua a ti tawpin ati hmel mawilo em em mai a, mihring hrisel leh khawpui fai ni turin a chhunga cheng mihring te hian mawhphurna kan nei theuh a ni a ti bawk.

Programme hi Pi PC Zonuntluangi, DUDO Kolasib chuan kaihruaiin bawlhhlawh thenfai mai nilo mahni nunphunga hriselna leh faina hi kan ngaihpawimawh a hun takzet ani tiin, hnatlang tura Kalkhawmte chungah UD&PA Department aiawhin lawmthu a sawi bawk a ni.

Hnatlang ah hian Kolasib khawpui chhunga Branch YMA tin atangin hruaitute leh member thahnem tak an thawkchhuak a ni.