1892/2026-2027

Kolasib, 21st August, 2026: Vawiin khan Kolasib leh Mamit District atana Electoral Roll Observer atana ruat, Dr. Lalrozama,IAS  chuan Kolasib rawn tlawhin, DC Conference Hall-ah election official-te, political party aiawhte, tlawmngai pawl (NGO) leh kohhran aiawhte nen thutkhawmna pawimawh tak an nei.

He hunah hian Observer Dr. Lalrozama chuan thu sawiin, a lo kal chhan chu tihtur rawn tuk tur ni lovin, tualchhung official-te hnathawh dan rawn enpui  tur zawk a nih thu a sawi a. Electoral Roll siamthat hna kal mekah Form thehluh endikna (hearing) pawh zawh fel a nih tawh thu sawiin, an hmalak tawh danah leh hmalak zel dan turah official-te leh NGO aiawhte ngaihdan hriat a chak thu a sawi a, rawtna leh thurawn pe theuh turin a ngen a ni. Dr. Lalrozama chuan SIR in a tum ber chu khua leh tui diktak, vote nei thei chin  te thliarhran leh paih  a ni lo tih sawiin, a dik leh fel taka thunluh an nih hi a pawimawh ber a ni, a ti. Tualchhung official-te, political party leh NGO ten theih tawp chhuaha hna an thawh thin avangin lawmthu a sawi a, hmabak la awmte pawh tha taka thawkho zel turin a chah a ni.

He thutkhawmah hian Electoral Roll siamthat hna kal mek dinhmun thlirhona neih nghal a ni a. Report atanga a lan danin, tun tumah hian Kolasib District chhungah Form 6 (Vote thar thunna) thehlut mi 1558 an awm a, heng zinga 787 te chu pawm (accepted) niin, 94 hnawl (rejected) a ni a, endik mek (under process) 677 an la awm a ni. Form 7  thehlut 25 awmin, 12 pawm a ni a, endik mek 13 a awm bawk. Form 8 (Siamthatna/Insawnna) thehlut 936 awmin, 528 pawm a ni a, 34 hnawl niin, 374 chu endik mek a ni.