Integrated Dairy Development Project hnuaia Project III-na, Kolasib-a AH & Vety Department-in kum engemaw zat a lo enkawl tawh, KOMUL tih a hriat lar chu vawiin khan Kolasib Milk Producers’ Co-operative Union Ltd. kutah hlan a ni a. KOMUL hlanna programme vawiina AH & Vety. Department Conference Hall-ah neih chu AH & Vety Minister Pu Nihar Kanti Chakma’n a hmanpui a, programme hi Dr. L. B. Sailo, Director, AH & Vety. Department-in a kaihruai a ni.

Pu Nihar Kanti Chakma chuan KOMUL Sawrkar kut atanga a taka thawktu leh leh bawnghnute sawngbawl a taka kalpuitu society kutah hlan a ni ta chu lawmawm tiin Department leh KOMUL tan ni chhinchhiah tlak tak a nih thu a sawi bawk. Harsa takin Sawrkarin KOMUL a lo din chho a, Department enkawlna hnuaia Mizoram tan asset tangkai a siam chu society chuan uluk leh duat taka enkawl zui turin a chah a ni.

KOMUL hlanna thuziak hi AH & Vety. Department aiawhin Pu T. Sangkunga, Secretary AH & Vety. Department chuan Pu R.V. Thansanga, Chairman, Kolasib Milk Producers’ Co-operative Union Ltd. a hlan a. Pu T. Sangkunga chuan KOMUL hi bawngvulh tute tan chenfakawm ni tura thahnemngai taka enkawl turin a chah a, an tihthat loh chuan society mai bakah Department pawh a mualpho thei a ni a ti a. An ngaituahna zawng zawng KOMUL than zelna turah seng turin a fuih bawk a ni.

KOMUL hi AH & Vety Department-in kum 2005 khan a din a. Tunah hian Kolasib Milk Producers’ Co-operative Union Ltd. hnuaia affiliated primary society 25 an awm mek a, KOMUL hi Sawrkarin an kutah kum 45 tan a hlan a. KOMUL bawnghnute hi Silchar-ah pawh thawn thlak thin a ni.