Vawiin chawhma dar 10:00 khan Kolasib tualchhung chanchinbu thar 'Kolasib Times' chu Press Club, Kolasib-ah MJA President Pu H. Vanlalnghaka'n a tlangzarh a, tlangzarhna inkhawm tawi ah hian chanchinbu editor leh publisher ni bawk LH Malsawmtluanga chuan chanchinbu tichhuak tura hun engemawchen a lo in buatsaih tawh dan a sawi.

MJA President H. Vanlalnghaka chuan Kolasib-ah tualchhung chanchinbu thar tihchhuah a ni chu lawmawm a tih thu leh Political party emaw khawilai Officer emaw behchhana newspaper siam chuan a daih rei ngai lo tih a sawi. "Keimahni kan in hriat aiin midang, pawnlammi in kan nihna an hrechiang zawk," tiin chanchinbu thenkhat, party behchhan lutuk avanga tlachhe ta te atanga inzir a pawimawh tih a sawi bawk.

Kolasib Times chanchinbu tlangzarhna inkhawmah hian Kolasib District chhunga chanchinbu mi engemawzatin an telpui a, hun tawp kharna hi Pu C. Thanmawia, MJA Vice President, Kolasib District chuan tawngtaiin a hmang a ni.