1889/2022-2023
Kolasib: dated 12th September 2022: Vawiin chawhma khan DC Conference Hall, Kolasibah FCS&CA Minister Pu K.Lalrinliana, Chairman, Kolasib Town Planning and Development Committee kaihhruaina hnuai ah thutkhawmna neih a ni a. Kolasib khawpui chhung ah hmasawnna awmze nei leh ruahmanna felfai a awm theih nan ngaihtuahna seng a, tihlawhtling tura thawk turin kalkhawmte a sawm.

Pu John LT Sanga, Deputy Commissioner, Vice Chairman, Kolasib Town Planning & Development Committee chuan Kolasib chu district pawimawh tak, Mizoram luhkapui leh zinmite tlan tlang tamna district a nih angin hmasawnna hna pawh uluk tak a ruahman a tul thu a sawi a. Pu Ralthuama Ralte, Deputy Director of Town Planning, UD&PA pawhin thawh hona tha tak hnuai ah, khawpui felfai duan hna kalpui a pawimawh thu leh hma thlir thui tak nei chung a ruahmanna siam a tul thu a sawi.

Vawiin thutkhawm ah hian Kolasib Town Planning area (Boundary) tur a ruahman tawh chu a hma aia huam zau zawk tur a rel a ni a. Kolasib khawpui chhunga inkalpawhna hrang hrang thawmthat hna thawh dan ngaihthlak niin, Thirhruibankawn atanga Hmar veng panna kawng zauh hna pawh zaa 95 zawh a nih tawh thu ngaihthlak a ni.

Kolasib khawpui chhunga veng tin ah lirthei hunna tur bik ruahman a nih theih nana hmalak dan tur sawi ho a ni a. Thlanmual intawm felfai tak a siam a nih theih nana hmalak dan tur te sawi a ni.

Thutkhawmnaah hian PowerPoint presentation hmangin Kolasib khaw chhung a ruahmanna kalpui theih dan hrang hrang enho a ni a. Kolasib district chhunga sawrkar department hotute, NGO hruaitute leh khawtlang aiawha mi rintlak a ngaih, sawm bikte an tel bawk a ni.