1890/2022-2023
Aizawl 12th September 2022: Vawiin khan Samagra Shiksha leh Mizoram Amateur Taekwondo Association(MATA) te chuan School Education Complex Conference Hall, Macdonald Hill-ah Rani Laxmibai Atma Raksha Prashishan, hmeichhe naupangte mahnia inven dan zirtirna tur thawhhona thuthlung an ziak a. He thawhhona thuthlungah hian Samagra Shiksha aiawhin Pu C.Lalthanzira Additional State Project Director-in hming a ziak a, MATA aiawhin Pu Joseph Thansanga General Secretary MATA-in hming a ziak bawk.

Samagra Shiksha leh MATA ten thawhhona thuthlung an ziahah chuan Samagra Shiksha hnuai school zawng zawnga hmeichhe naupangten mahni inven dan an thiam theih nan leh inrintawkna an neih theih nan MATA-in zirtirna an kalpui ang a. District hrang hranga sorkar sikul zawng zawng elementary leh Secondary, a vaiin school 1263 te chu tuam vek an ni ang. District Project Office, Samagra Shiksha leh District Amateur Taekwondo Association te anmahni huamchhung theuhah an thawkho dawn a ni. Self defence zirtirna hi thla thum chhunga zawh tura ruahman a ni a, zirtirtu tur chu MATA ten an ruat dawn a ni. Hmeichhe naupangin tawh sual a lo tawh palha insaseng thuai dan te, a bula hmanraw awm hnai apiang hman tangkai thiam theih dan turte zirtir an ni dawn a ni. Kum 2015 atang khan hmeichhe naupangte mahnia inven dan tur zirtir hna hi kalpui a lo ni tawh a, kumin hian MATA leh Samagra hian thawhhona an chhunzawm zel dawn a, tunah hian MATA chuan instructor turte tan training a buatsaih mek a ni.

Mizoram Samagra Shiksha hian Self defence a kalpui hi India ram pumah a tichhuak hmasa bertu a ni a, Mizoramin a tihchhuah atang hian Ministry chuan tha a tih avangin India ram state dang zawng zawngah pawh kalpui turin a ruahman zui a ni. Vawiina thawhhona thuthlung ziahnaah hian Samagra Shiksha State Project Office-a Officer te leh MATA Office Bearer te an tel a ni.