Vawiin khan Kolasib Town Road Development Coordination Committee chu an chairman Pi Niharika Rai, IAS hovin a office chamber-ah an thukhawm a. Kolasib khawchhung kawng siam hna NBCC ten an thawh mek chungchang an sawi ho.

Tarlan tawh thin angin Kolasib Town Road siam hna hi National Building Construction Company (NBCC) chuan a thawk a. A hnuaiah hian CT. Mawia Construction Company chuan kawng hi an siam a ni. Kolasib khaw chhung kawng siam mek hi Package I leh Package II tea then a ni a. Kawng hi siam zawh hun tura zawh a nih loh avangin Town Road Development Comittee phalnain zawh hun tur hi vawi engemawzat sawnsak an ni tawh a. Tunah hian Package I thawh zawh hun tura tih chu March 31, 2012 hi a niin hemi hunah hian thawh zawh a nih dawn tawh thu vawiina Committee-ah hian NBCC hotute chuan an sawi a ni. Package II thawh zawh hun tur chu June 30, 2012 khi a ni.

Committee-ah hian tunhnaia Sub Committee on Monitoring Town Road Committee tena kawngpui siam hna kal mek a hmuna an endikna report an thehluh tak leh chumi ina a kaihhnawih thil te thlir ho a ni a. Pi Niharika Rai chuan Sub Comtt. te thu thehluh NBCC in an chhanna chu sawi chhuakin khaw mipui te duhdana quality tha zawka hna chhunzawm nise a ti a. Furpui thlen hmaa Package II pawh chak taka kalpui turin Contractor te chu a hrilh a ni.