Kolasib Town Road siam mek thlirin vawiin khan Kolasib Town Road Development Coordination Committee chu an chairman Pi Niharika Rai, IAS, DC hovin a office chamber-ah an thukhawm a. Khaw chhung kawng siam hna chu a hmawrbawk a hnaih tawh mek laiin PWD leh UD & PA ten Joint inspection an neih hunah Town Road Monitoring Sub Committee te chu tel ve ngei se, hei hian siam that ngaite siam tha turin hun a siam sak dawn a ni, an ti.

Town Road siam hna kal mek hi Committee chuan a khat tawkin an thlir ho thin a. A hmaa zawh hun tura hun an pek February 2013 tih chu tun dinhmunah Culvert siam hna hautak deuhte ala awm bawk avangin Contractor NBCC Engineer te ngenna 15th March ah sawn leh nise tih chu a pawmsak a. A rang thei angin Monitoring Sub Committee te pawh kal kual leh a, endik hna thawk turin an ti bawk a . Contractor ten an thawh zawh vek hnuah Joint inspection neiin Town Road Committee hriatpuina leh remtihpuina hnuaiah chauh PWD kutah hlan nise, an ti a ni.

Member ten siam that leh ngai nia an hriat College Venga Drain siam tawh te, Project Veng to Park Kawn kawng te pawh en that nise tiin Committee chuan a rel a. Town Road siam mekah hian khaw mipui tana kawng lun leh pawimawh siam that ngai a awm a nih chuan inthlahrung lova DC hnena ziaka hrilh turin Committee chuan a ngen nghal bawk a ni.