640/2025-2026

Dated Kolasib the 16th May, 2025 : Vawiin chawhma dar 11:00 khan Kolasib Traffic Office kawtah Kolasib Town Traffic Management Public Notice tlangzarhna leh Two wheeler Proton man khawm chil chhiatna hun hman a ni a. He hun hi Pu David H. Lalthangliana, Sr. SP Kolasib chuan kaihruaiin, Kolasib DC Pu Robert C. Lalhmangaiha’n Public Notice hi a tlangzarh a ni.

Tlangzarhna program Kaihruaitu Kolasib SP chuan vawiina kalkhawmte hnenah lawmthu sawina a neih zawh in Kolasib District Traffic Management Committee alo pian chhuah dan a sawi lang a. Kolasib chu District lian a nih avangin leh lirtheite an lo pun belh chhoh zel avangin SP Office atanga Traffic siksawi chungchang zawng zawng chu direct a notification te tichhuak mai lovin, notice thenkhat chu KDTMC din a, chumi ruahmanna angte bawhzui chu khawpui lian chho zel ah a pawimawh hle nia hriat a nih avangin nikum ,2024 khan DC Chairman na hnuaiah Kolasib District Traffic Management Committee chu din a ni ta a ni, a ti.

Vawiina an Public Notice tlangzarh chu siamthat leh belh ngai te pawh a awm theih a avangin vawiin atanga thla thum chhung enchhin phawt tum a ni, a ti a. Vawiina Notification hian hemi chungchanga Notification lo awm tawh te a thlak dawn a ni, a ti bawk. An notification chuan mi leh pawl thenkhat te a ti lawm vek lo maithei a, amaherawhchu mipui tana tha zawk ngaihtuahna atanga lo chhuak a ni, a ti.

He huna Khuallian Kolasib DC, Pu Robert C. Lalhmangaiha chuan thu sawiin, Kolasib a Traffic mumal taka a kal theih nana thawktute zawng zawng chungah lawmthu a sawi a. A bik takin SP nen tun thilah mai nilo, thil dangah pawh thawhhona tha tak an nei thin chu a lawmawm takzet a ni tiin, SP Senior leh dawn thui tak Kolasib in a nei chu a lawmawm takzet a ni, a ti. DC chuan vawiina Notice, Parking leh Stand hrang hrangte sawnna thuchhuah an tlangzarh tur chu mipuite hmakhawngai a tihchhuah a ni, a ti a. Hemi chungchanga lungawilohna neite pawh an awm thei a, amaherawhchu Kolasib khawpui thang chho zel enin mumal taka Traffic a kal theih nan vawiin a an Public Notice tihchhuah chu a pawimawh takzet a ni, a ti a. He Public Notice-a ruahmanna awmte chu a famkim tawk lohna a lo awm maithei a, chuvang chuan thla thum chhung enchhin a ni anga, siam that ngai chu an siamtha leh dawn a ni tiin Kolasib District hmasawna kawnga ke a pen zel theih nan Sawrkar, mimal leh pawl hrang hrangte chu tang ruala hma la ho thiam zel turin a chah bawk.

Kolasib DC chuan vawiina Two-Wheeler Proton Kolasib Traffic Police te an man sa; chil chhiat tur chungchang pawh sawi langin, heng Proton-te hian vantlang mipuite tan ribengchheng tak a siam thina, damlo leh kum lama upa leh chak lote ti thlabartu a nih thu leh zan lama mipuite chawlh hahdamna hun tibuai a, kawngpui dunga awmte mu tha theilo a siam thintu a nih thu sawiin Sawrkar pawhin khap tlat thu a tarlanga. Vawiina langsar taka a tihchhiatna hun an hman pawh thalai lirthei neite’n in zir nan an hman phah ngei a beisei thu a sawi a ni.

Vawiin a Kolasib Town Traffic Management Public Notification tlangzarh tak hi Kolasib khawpui chhunga Traffic mumal taka a kal theih nana ruahmanna siam a ni a. He ruahmanna ah hian Auto Stand leh Maxi-Cab Sumo Stand-te sawn kual anni hlawm a, thla thum chhung enchhin tura tih a ni. Hemi tlangzarhna neih zawhhian proton chil chhiatna hun hman a ni bawk.

Vawiina Kolasiba Traffic Management Public Notice tlangzarhna leh Two wheeler Proton man khawm chil chhiatna hun hmanna ah hian Pu R. Lalnunpuia, Sub-Divisional Police Officer (SDPO), Pu Lalthangkima, District Commerce & Industries Officer(DCIO), Pu David A. Lalhmingchhuana, District Information & Public Relations Officer (DIPRO) bakah Mizoram Journalist Association(MJA) Kolasib District-te a an tel thei a. Pu R.K. Vanlalruala SI in lawmthu sawina a neih zawh in vawiin hun hi tihtawp a ni.