641/2025-2026

Saitual, the 16th May, 2025: Vawiin chawhma dar 11 khan District Level Civil Defense Advisory Committee (DLCDAC)-in a lo rel tawh angin Saitualah van sang atanga beih tawh thulha chetlak dan tur nunchan zirna- “Air Raid Mock Drill” chu tluang taka zawh fel a ni.

Civil Defense Air Raid Mock Drill atan hian hmun pa 5 thlan a ni a, Govt. Selchhunga P/S, Saitual chu van sang atanga beih (air strike) tawhna hmun atana thlan a ni a, building chu kangin naupang engemaw zatin hliam an tuar. School-a Incident Commander chuan District Civil Defense Control Room/ DEOC chu be pawpin chanchin a hrilh hria a, DEOC lam hian a tul anga hma la turte an tir chhuak nghal a ni.

Zirlai naupang hliam tuarte hi Temporary Hospital atana siam Saitual Auditorium-ah Quick Response Team (QRT) ten an hruai nghal a, hetah hian Medical team ten an theih ang angin damlo hliam tuarte hi an lo buaipui a. Zirtirtute leh zirlai naupang cham bangte chu an him zawk nan Bunker atana siam Saitual Bazar lamah YMA te leh QRT ten an hruai bawk a ni.

Air Raid Mock drill atana thlan hmunah te hian Mock drill kaihruai turin Incident Commander ruat theuh an ni a, a pui turin officer te leh YMA te ruat an ni bawk. Head Observer atan Pu V. Laldinsanga, Project Director, DRDO ruat a ni a, a ni hian hmun hrang hranga an chetlak dan te endikin, report a thehlut dawn a ni. Mock drill hi chhun dar 12:00 velah tluang taka zawh fel a ni.