642/2025-2026

Khawzawl, dated 16th May 2025: Vawiin khan Khawzawl Higher Secondary School-ah Khawzawl Police hmalaknain ruihhlo laka fihlim tura inhrilhhriatna (drugs awareness campaign) neih a ni a, air raid leh chhiatna chungchangah inzirtirna neih a ni bawk.

Drugs awareness campaign hi Dy. SP Pu Vanlalzawma'n a kaihruai a, ruihhlo chi hrang hrang chungchang te, dan hnuaia hremna awm chi hrang hrang te, taksa tana a that lohna te leh mimal leh khawtlang a khawih chhiat dan te sawiin ruihhlo laka fihlim turin zirlaite a chah a. Air raid leh chhiatna hrang hrang chungchang inzirtirna hi SDC Pu Paul Rokima'n a pe a, air raid a awm palh hlauha tih tur leh tih loh tur te, siren rik dan azira inhriattirna chi hrang hrang te, chhiatna hrang hrang thlen thulha tih tur leh tih loh tur te a sawi a, inzirtirna neih te vawng renga inralring reng turin zirlaite a fuih a ni.

Air raid leh chhiatna chungchanga inzirtirna te hi Khawzawl District Disaster Management Authority (DDMA) ruahmanna angin zirna hmun hrang hrangah la neih zel tur a ni a, Khawzawl SP Office hmalaknain drugs awareness campaign hi hmun hrang hrangah neih zel tur a ni bawk.