No.7965/2020-2021

Dated Kolasib the 30th March 2021 : Indian Super League-a Player khel tha, Kolasib Vengthar tlangval Paul Ramfangzauva chawimawina hun Vengthar Village Council buatsaih chu bialtu MLA Pu K. Lalrinliana, LAD Minister-in a hmanpui.

He inkhawmnaah hian Minister Pu K. Lalrinliana chuan Tv. Paul-a chu hlawhtlinna chang tura a thawhrimma leh ruihthei thil laka a insum theihna chu fakawm a tih thu sawiin Football mai bakah Sports Discipline hrang hrang tui mite tan pawh entawn tlak ni zel turin a chah a. Tun dinhmunah Mizoramin thalai Sports lama tui mi leh khawvel huap ang pawha mizo hming tihmingthatu kan awm thin chu lawmawm a tih thu a sawi. Minister chuan, Mizoram sawrkar pawhin hei hi hriain Sports hi Industry pakhatah a ngai a, nasa takin Sports Policy pawh duangin hma a la chho zel a ni, a ti.

Vawiin a Indian Super League-a Player titha chawimawi, kum 26 mi, Paul Ramfangzauva hi Pu H. Lalthuamluaia leh Pi RC Lalfakzuali fapa niin, Vengthar Kolasibah an chhungkuain a khawsa a. Mizoram Football khawvelah sulhnu tha tak tak lo nei fo tawhin, Dinthar FC, Chhinga Veng FC leh Aizawl FC ah pawh lo khel tawh thin a ni. I-League ah pawh Hero of the Match vawi 2 lai ni tawhin, chawimawina hrang hrang a lo dawng tawh bawk a. Zirna lamah pawh Pachhunga University College (PUC) ah zirchhuak tawhin, zirna bahlah lo leh chawlhsan lovin Football zin kawng tluang takin a zawh chho mek a ni. Hrisel turin a in enkawl uluk hle a, ruihthei thil lakah a fihlim bakah zuk leh hmuam a ti lova, Sports Association leh Football Club hrang hrang fak pawh a hlawh hle a ni. Kolasib Vengthar tlangval Paul Ramfangzauva hian India ram Football in el na sang, Indian Super Leaque-ah, Odisha Football Club tan a khel a. Season kal ta khan Hero of the Match tum hnih dawngin, goal 2 Odisha club tan hian a khung bawk a ni.

Vawiin a Tv. Paula chawimawina inkhawmnaah hian District Sports Officer (DSO), Kolasib District Sports Association (KDFA) leh tlawmngai pawl hrang hrang YMA, MHIP, MUP leh Millennium Generation Kolasib (MGK) ten telpuiin chawimawi thuziak an hlan bawk a ni.