Naktuk a Silchar-a Friendly Match khel tur Kolasib XI team te chu vawiin chawhnu dar 1 khan Kolasib Addl. DC Pu Zairemmawia’n DC kawttual atangin a vailiam ta.

Kolasib XI te hi Silchar XI te nen naktuk hian Silchar-a Rajiv Gandhi Sports Complex-ah an inkhel dawn a. Tarlan tawh angin Kolasib DC Pi Niharika Rai ruahmanna in State pahnih te inkara inunauna leh inthian thatna boruak a awm theih nana he friendly match hi neih tur a ni a. Kolasib team te hi thlah liam pahin Pu Zairemmawia chuan an kal chhan hre reng chunga mawi taka inkhel tur leh hnehna chang ngei turin a chah a ni.

Kolasib XI te hi Pu Johnny Zothanchama, AE, DRDA leh Kolasib Town Zone Football Association hruaituten an hova. Naktuk hian DC Pi Rai hovin Department officer te leh Football ngainatu mi thahnem tak Kolasib atangin an thawk thla dawn bawk a ni. Mahni motor kalna neilo tan Bus pahnih (2) ruahman a niin YMA Branch tin atangin kal tur siam a ni.