Vawiin dar 10:30am khan Lawngtlai DC Conference Hall-ah District Level Vigilance and Monitoring Committee meeting neih a ni a. He meeting hi Pu Lalhmingliana, MP (Rajya Sabha) in a kaihruai a, Pu C.L. Ruala, MP (Lok Sabha), Parliamentary Secretary Pu H. Zothangliana, Pu Kali Kumar Tongchangya, CEM, Chakma Autonomous District Council leh Member Secretary Pu B. Lalhmingthanga, DC, Lawngtlai te bakah Pu Thangchem Zathang, Project Director, DRDA, Lawngtlai te, Lawngtlai district chhunga BDO te, a kaihhnawih District Officer te leh NGO aiawh te an tel a ni.

Lawngtlai District Vigilance and Monitoring Committee chuan Lawngtlai District chhunga Centarlly Sponsored Scheme hrang hrang - Mahatma Gandhi National Rural Employment Guarantee Scheme (MGNREGS), Pradhan Mantri Gram Sadak Yojana (PMGSY), Accelerated Rural Water Supply Programme (ARWSP), Total Sanitation Campaign (TSC), National Social Assistance Programme (NSAP), Swarnajayanti Gram Swarojgar Yojana (SGSY), Indira Awaas Yojana (IAY) leh Integrated Watershed Management Programme (IWMP) hna thawh tawh leh thawh mek te thlir hoin a tha lo lai te an zawng chhuak a, hmasawn dan tur leh siamthat dan tur an sawi ho a. Scheme hrang hrangin hna thawh dan tur a sawi ang zawm chunga hna tangkai zawk thawh dan tur an sawi ho a, Lawngtlai district-a CSS hna thawh dan chu a tlangpuiin tha thawkhata an ngaih thu an sawi bawk.

Meeting Chairman Pu Lalhmingliana MP (Rajya Sabha) chuan mi thenkhat mahni tanghma haite avangin ram hmasawnna hna kan thawh hian a tuar tur a ni lo. Hna nena inmil loa pawisa hman ral hi ven a ngai a, hna thawhte a taka tih chianna atan thlalak te hman tangkai a tul tih sawiin hna thawk tha turin insiam a tul a ti a. NREGS kan thawh dan hian kan work culture leh nunzia a tih chhiat a hlauhawm tih sawiin system tha zawka kalpui dan zawn a tul a ti a. Awmze nei deuh hleka hna thawh a tul a, nakin zela chhawrnahawm tur ngaihtuahin job card neite ram nei an awm chuan an ram chei sak te, terrace laih sak te pawh NREGS hnuaiah hian hawi ve tawh ila tiin a sawi a. IWMP hnuaia catchment area tihpunna atan ramngaw humhalh leh siam belh a tul tih a sawi a, hlawhtlinna hi beneficiary teah a innghat thui em em a, beneficiary ten an tih tur dik tak an tih a pawimawh a ti bawk.

PU C.L. Ruala MP (Lok Sabha) pawhin hna thawk tha lo te thawh that loh chhan zawn chhuah a tul thu te, NREGS hnuaia material component-a hna thawh enpui thin a tul a ti a. Job Card chuang leh a lem te zawn chhuah kawnga hmalak dan te ngaithlain NREGS material component hmanga khaw 1-a hna te nau tih tam ai chuan project lian deuh, khawtlang tana rotling thawh mai a tha tiin a sawi bakah IAY hnuaia BPL insak tur list hi Gram Sabha in siam se a fuh bera a hriat thu a sawi a ni.

Lawngtlai District-ah hian MGNREGS hnuaiah job card 24345 awmin ni 65 inhlawh tawh a ni a, February chhungin ni 15 leh March thlaah ni 20 inhlawhna siam turin ruahman fel a ni tawh a, ni 100 inhlawh theih a nih dawn thu Pu Thangchem Zathang, PD, DRDA chuan a sawi a. 2011-2012 chhungin ARWSP hmangin Lawngtlai District-a khaw 19 ah tuilak hna thawh zawh hman tum a ni a. SGSY hnuaiah Self Help Group 8 awmin tha takin hna an thawk mek a. IAY hnuaiah hian in 283 sak zawh tawh niin 244 sak mek a ni a, TSC hnuaia project 3 chu zawh fel tawh niin project hmabak pawh March, 2012 ah zawh hman beisei a ni.