3364/2022-2023

Kolasib dated 25th January 2023: Vawiin khan I&PR Conference Hall, Kolasibah Election Commission of India ruahmanna angin ‘Nothing like voting, I vote for sure’ tih thupui hmangin 13th National Voter’s Day hman a ni a. Pu John LT Sanga, District Election Officer chuan khuallian niin Pu Gaston Vanlalhriatpuia, Election Officer chuan hun a kaihruai a ni. I&PR Conference Hall a hun bak ah hian Kolasib district chhunga Sawrkar office tin a thawktuten Voter’s Pledge sawi rualin, zalen tak a duhthlanna hmang a inthlanna boruak muanawm siamtu ni turin thu tiam an la a ni.

District Election Officer Pu John LT Sanga chuan mipuite duhthlanna hmang a roreltu thlanchhuahna ram lian ber, India ram a voter nih chu a ropui thu sawiin Inthlanna buatsaih kawng a thawktute phei chu hna ropui tak thawktu an nih thu a sawi a. India khawmualpui zau tak, hnam, ziarang, tawng, sakhuana hrang hrang vuan mipui tam tak chenna ni mahse India dan pui hnuai ah inthliarna awm miah lo a duhthlanna chanvo angkhat kan nei chu lawmna chang kan hriat thar fo a tul thu leh chu chanvo chu a tak a chantir tur a vote kan thlak thin hi a pawimawh thu a sawi. Pu John LT Sanga chuan Election kaihnawih a hna hrang hrang zingah Electoral Roll rintlak siam te, Vote thlak ngai pawimawh tur a mipui nawlpui inzirtirte leh inthlanna thianghlim leh langtlang kalpui a pawimawh thu sawiin thawhhona tha tak avangin Mizoram chu vote tlakna tha pawl a nih thin thu a sawi. Sawrkar hnuai a Department hrang hrang a thawktute bak ah khawtlang hruaitute leh kohhran hruaituten inthlanna felfai a awm theih nana an hmalak thinna chuan State pawn atanga endik tur a lo kalte fak kan hlawh thin thu District Election Officer chuan tarlangin State dangte entawntlak ni tur a thawhhona tha nei chhunzawm zel turin kalkhawmte a sawm bawk a ni.

13th National Voter’s Day pual a hun hmanna ah hian kum 18 tling thar, vote thlak thei tur a Electoral Roll a inziaklut mi 10-te hnen ah EPIC hlanna hun leh mahni bial enkawl kawng a Kolasib district chhung Assembly Constituency pathum atanga BLO tithazual thlanchhuah te hnen ah lawmpuina thilpek hlan an ni a. Pu Timothy R.Lalhmangaiha, BDO, Bilkhawthlir hnen atangin Vote thlak pawimawhna te, Electoral Roll a hming thlak, paih leh siamthat chungchang a hriattur pawimawh te ngaihthlak niin ECI atanga thuchah ngaihthlak a ni bawk.

13th National Voter’s Day pual a SVEEP kaltlang a Vote thlak pawimawhna leh KYC-ECI Apps leh National Voters Service Portal hman tangkai dan Video Clip buatsaih chu tlangzarh a ni bawk a ni.