38/2024-2025 

Kolasib dated 3rd April, 2024: Vawiin khan DC Conference Hall, Kolasibah Lok Sabha MP inthlanna neih tur atan a Campaign senso chhinchhiah leh ziah luh dan inzirtirna hun buatsaih a ni a. Pu John LT Sanga, Deputy Commissioner chuan hun kaihruaiin Pu Kevin Lalmalsawma, MF&AS, Treasury Officer chuan zirtirna a pe a, 4-Tuirial, 5-Kolasib leh 6-Serlui Assistant Expenditure Observer leh Political party hrang hrang Expenditure Agent-te an tel a ni.

Pu John LT Sanga, Deputy Commissioner chuan Party hrang hrang candidate-ten Campaign-na mual thuhmun ah intluktlang tak a vote an zawn theih nan Election Commission of India chuan campaign-na tur senso phal chin a bituk thu a sawi a. Chung senso te chu dik tak a chhinchhiah leh ziah luh a nih theih nan kalphung zawm tur a awm thu sawiin inthlanna felfai leh langtlang kalpui tur chuan chung inkaihhruainate chu Assistant Expenditure Observer leh Expenditure Agent ten an hriatchian a pawimawh thu a sawi.

Training petu, Pu Kevin Lalmalsawma, Treasury Officer chuan Candidate tin ten inthlanna a tel tur a hming an pek luh atang a inthlan result puan a nih thleng a an hman tur Account hran an siam a tul thu leh chu Bank account number chu Returning Officer hnen ah an puanzar a tul thu a tarlang a. Election result puan a nih atang a ni 30 ral hmain an senso zawng zawng chhinchhiahna lehkhabu chu thehluh a ngaih thu a sawi. Treasury Officer chuan Political party Expenditure Agent-te chuan campaign nana nitin senso chhinchhiahna bu an enkawl tur a nih bak ah Expenditure Observer-in vawi 3 a endik pui tur thu a sawi a. Heng inkaihhruaina hrang hrang zawm lo te hrem theih dan a tarlangin Training-na ah hian Campaign nan cheng nuai 95 thleng hman phalsak an nih thu sawi a ni.