3228/2024-2025

Dated Kolasib the 27th November 2024: Vawiin khan Kolasib DC Conference Hall ah NH 306&06 thawmthat hnathawh kal mek leh chak zawk a hna a kal theih dan tur chungchang sawiho a ni a. He thutkhawmna hi Mizoram Legislative Assembly Deputy Speaker leh Kolasib Bialtu MLA ni bawk Pu Lalfamkima chuan a telpui a ni.

Thutkhawmna kaihruaitu Kolasib DC Pu Robert C Lalhmangaiha chuan Kolasib District inkalpawhna chungchang a thutkhawmna pawimawh tak Deputy speaker in a ho thei chu lawmawm a tih thu a sawi a. Deputy Speaker chuan kawng chungchang chu a ngai pawimawh takzet a, theihtawp in contractor te leh NHIDCL te nawr in Mizoram Sawrkar hotute pawh a titipui thin a ni, a ti. kalkhawmte chu hnathawh hun (working season) reilote chhunga chak taka hma lak a nih theih nan an ngaihtuahna seng a sawiho turin a sawm nghal bawk a ni.

Deputy Speaker Pu Lalfamkima chuan thu sawiin, kawng tha neih a nih theih nan kawng hrang hrang a hma lak a lo ni tawh thin a. Amaherawhchu chhan hrang hrang leh chhuanlam eng eng emaw avangin Company leh Contractor ten duhthusam in hna an thawk thin lova, chuvang chuan motor tamtak tan tlan a him lova, Traffic nasa tak in a jam phah thin bawk a, kan chak lakluhna pawhin a tuar tazet a ni, a ti.

Deputy Speaker chuan kawng chhia in a nghawng ber chu mipuite an nih avangin kawng siamtute pawhin mipuite tan hna an thawk tih an in hriat angai takzet a ni, a ti a. Mizoram lung tam zawk chu lung chang tha a nih loh avangin hun reilote bak a daih lova, chuvang chuan rampawn lam atanga lung chang tha leh material pawimawh dang te chaw lut thin turin NHIDCL, Balaji Construction leh Sadguru Contractors te chu a hrilh bawk a ni. Pu Lalfamkima chuan,'Mizoram chuan climate hran leh leilung hran a nei a, kan kawng siamtu tamtak te hi State pawn lam mi an nih avangin kan ram leilung ngun taka an zir chian hmaksak angai a ni,'a ti a. Tun working season reilote hi hmang tangkaia Contractor te pawhin rinawm taka an hnate an thawh angai a ni, a ti. He kawngtha neih theih nan hian sawrkar mai ni lovin NGO leh Pawl hrang hrangte chu an pawimawh vek avangin theihtawp an chhuah ho angai a ni, a ti bawk.

Thuthkhawmna ahhian NHIDCL leh Contractors te atangin an hmalak tawhna leh hna an kalpui tum zel dan tur, an work schedule tlangpui ngaihthlak a ni a.NHIDCL hian Vairengte -Bilkhawthlir leh Kolasib - Kawnpui inkar kawng chu nakum March 2025 bawr chho a Black Topping zawh hman an in beisei thu an sawi. Pawl aiawh a lokal te pawh in hna chak zawka kalpui a nih theih na turin Sawrkar leh Contractors te chu theihtawp chhuah turin an ngen a, a tul ang anga thawhpui an in huam thu an sawi bawk a ni.

Vawiin a thutkhawmna ahhian Deputy Speaker leh Kolasib DC bakah Kolasib SP Pu David H Lalthangliana , PWD SDO(HIGHWAY), Forest ACF, DTO, NHIDCL aiawhte, Balaji leh Sadguru aiawhte, Kolasib District Truck Owners Association, JAC Kolasib, YMA Sub Hqrs aiawhte leh sawmbik mi pawimawh te an tel a ni.