3227/2024-2025

2024 Sahmulphah thla ni 27: Lunglei District chhunga vantlang tana ei leh in siamna hmunte'n thianghlim leh hrisel taka ei siam leh zawrh an kalpui theih nana District Level Advisory Committee on Safe Food & Healthy Diets-in thingpui dawr leh ei siamna hmunte endik tura joint inspection team a din chuan vawiin khan Lunglei khawpui chhunga thingpui dawr leh restaurant ṭhenkhat an endik.

Joint inspection team hian a hmaa endikna an lo kalpui tawha hriattirna an pek dawr 12 tlawh nawnin, hma an sawnin, an felfai tawh a, inkaihhruaina pawh an zawm ṭhain, food licence pawh an lo nei tawh hlawm tih hmuh chhuah a ni a. Dawr dang 6 tlawh zui bawkin, thianghlimna leh faina kawnga duhthu an sam lohna laiah hmasawnna tur kawhhmuh an ni a. He'ng dawr an endiknaah hian meizuk phal loh thu hriattirna tar tur an sem nghal bawk.

Joint inspection team hian thingpui dawr, restaurant, bakery, catering leh ei siamna leh zawrhna hmun dangte tana endikna tur duan sa hmangin Lunglei khawpui chhungah endikna kalpui mekin, bawlhhlawh bawm awm dan te, kut silna leh thleng silna hmun te, kut hrukna/tui in tur/inthiarna dinhmun te, ei tur vawn ṭhat dan te, ei siamtute leh ei siamna hmun fai leh thianghlim dan te, ei tur dah ṭhatna him leh phui a awm leh awm loh te, Food Safety Standards Authority of India (FSSAI) registration an neih leh neih loh leh inkaihhruaina an zawm ṭhat leh ṭhat loh te, faina, thianghlimna leh hriselna kawnga an chet dan hrang hrangte endikin, an dinhmun azirin point an pe ṭhin a. Hmasawn ngaite chu an hmasawnna tur kawhhmuh ṭhin niin, hriattirna pek tawh hnua hma la ṭha lote chu pawisa chawitir bakah, khauh zawka hma lak zel tum a ni.