1678/2026-2027

Kolasib, the 6th August, 2026 : Vawiin khan I&PR Conference Hall, Project Veng, Kolasibah 'District Level Red Ribbon Quiz Competition' buatsaih a ni a. He hunah hian Kolasib Additional Deputy Commissioner, Pi B. Malsawmtluangi chu khuallian a ni. Kolasib District chhunga sikul hrang hrangte'n Quiz intihsiakna neiin, Abisak Lalrinzaui leh Vanlalveni, Saidan Secondary School, Kolasib zirlaite chuan pakhatna an dawng.

He hun hi Dr. R.K. Lalthlamuana, Chief Medical Officer (CMO), Kolasib chuan a kaihruai a. Naupangte leh thalaite hian HIV/AIDS hlauhawmzia hre chianga, fimkhur tur leh sual laka fihlim tlat turin a chah. Tun tuma pakhatna latute hi State Level Quiz Competition-ah an tel leh dawn a ni, a ti a. Quiz-a tel sikul zawng zawngte hnenah District AIDS Prevention Control Committee hmingin lawmthu a sawi bawk.

Khuallian Pi B. Malsawmtluangi chuan, District AIDS Prevention Control Committee ten zirlai naupangte tana Red Ribbon Quiz an buatsaih chu lawmawm a tih thu a sawi a. He intihsiakna buatsaih a nih chhan hi zirlai naupangten HIV/AIDS hlauhawmzia leh fimkhur a ngaihzia an hriat thar nan a ni tiin, HIV/AIDS kai theihna tam ber chu hmeichhiat mipatna hman sual leh hriau inhmantawm atangte a ni, a ti a. Zirlaite chu an hma hun eng leh duhawm tak tichhe thei ruihhlo laka fihlima, nun fimkhur turin a chah a ni.

Zirlai naupangte tan social media hman thiam a pawimawh em em thu sawiin, an zirna atana hmanrua tangkai tak a nih rualin fimkhur taka thunun thiam a tul thu a sawi a. Zirlaiten social media chu hmanrua mai a ni tih hre renga, hun leh mimal nun tibuai lo zawnga finfiahna leh hriatfiahna nena tangkai taka hman thiam a pawimawh hle a ni, a ti. Zirlaite chu thil tha leh dik zawk thlanga, taima taka lehkha zira hlawhtling theuh turin a chah bawk a ni.

Vawiina District Level Red Ribbon Quiz Competition-a tel te hi District huam chhunga sikul hrang hrang 17-a intihsiakna lo hmachhawn tawh zinga a ti tha zual  k sawm (10) thlan chhuah te an ni a. Heng sikulte hi an ni:

 * Govt. C.Z. Higher Secondary School, Kolasib

 * Saidan Secondary School, Kolasib

 * Lalfak Memorial High School, Kawnpui

 * Vairengte Higher Secondary School

 * Saipum Higher Secondary School

 * Govt. Middle School, Kolasib

 * St. Maria Goretti's School, Kolasib

 * Army School, Vairengte

 * St. John Higher Secondary School, Kolasib

 * Govt. Hmar Veng High School, Kolasib

Vawiina Intihsiakna result chu hetiang hi a ni:

Pakhatna : Saidan Secondary School, Kolasib

Pahnihna : St. John Higher Secondary School, Kolasib

Pathumna : Lalfak Memorial High School, Kawnpui

District Level intihsiaka pakhatna te hi kumin August, 2026 chhunga State Level intihsiakna awm turah Kolasib District aiawhin an tel leh dawn a, an tih that dan a zirin National Level thlengin an tel thei dawn a ni.